ডিজিটেল ডেস্কঃ এখন দুই লাখ জনসংখ্যাৰ চহৰত লকডাউন ঘোষণা কৰিলে উত্তৰ কোৰিয়াৰ শাসক কিম জং উনে। কিন্তু কিয় ঘোষণা কৰা হ’ল লকডাউন? দৰাচলতে উত্তৰ কোৰিয়াৰ সেনাৰ পৰা ৬৫৩ টা গুলী চুৰি হৈছে। ইয়াৰ পিছতে কিম জং উনে সমগ্ৰ চহৰ এখনত লকডাউন ঘোষণা কৰিছে। উত্তৰ কোৰিয়াৰ একনায়ক কিম জং উনৰ এনে ঘোষণাই এতিয়া চহৰ খনৰ মানুহক সমস্যাত পেলাইছে।
কিম জঙে কয় যে দুই লাখতকৈ অধিক জনসংখ্যাৰ হাইচান চহৰখনক ৬৫৩ টা গুলী বিচাৰি নোপোৱালৈকে লকডাউনত ৰখা হ'ব। ৰেডিঅ' ফ্ৰী এছিয়াৰ মতে সেনাই বেৰেকলৈ ঘূৰি অহাৰ সময়তে ৬৫৩ টা বন্দুকৰ গুলী নাইকিয়া হৈছে। ইয়াৰ পিছত, কিম জঙে কৰ্তৃপক্ষক সমগ্ৰ চহৰখন তন্ন তন্ন কৈ তালাচী চলাবলৈ নিৰ্দেশ দিছে। ৰায়ংগাঙৰ এজন বাসিন্দাই কৈছে যে চহৰখনত ৬৫৩ টা গুলী বিচাৰি নোপোৱালৈকে লকডাউন বাহাল থাকিব।
৭ মাৰ্চত কোৰিয়ান পিপলছ আৰ্মীৰ ৭ম বেটেলিয়ন এই অঞ্চলৰ পৰা বেৰেকলৈ উভতি আহিছিল। কৰোনা মহামাৰীৰ সময়তে চহৰ খনত সেনা মোতায়েন কৰা হৈছিল আৰু কৰোনা সংকট সমাপ্ত হোৱাৰ পিছত তেওঁলোকক পুনৰ বেৰেকলৈ ঘূৰাই অনা হৈছিল। এই সময়ছোৱাত ৬৫৩ টা গুলী হেৰুওৱাৰ ঘটনাটো ঘটে । এতিয়া এই গুলীবিলাকৰ সন্ধানৰ বাবে চহৰখনত তালাচী চলি আছে।
প্ৰথমে, সৈন্যসকলে বিষয়টো কাকো নজনোৱাকৈয়ে নিজে গুলীবিলাক বিচাৰিবলৈ আৰম্ভ কৰিছিল। কিন্তু যেতিয়া তেওঁলোকে গুলীৰ সন্ধান উলিয়াব নোৱাৰিলে তেতিয়াই কৰ্তৃপক্ষক এই বিষয়ে অৱগত কৰে।
চহৰখনত গুলীৰ অনুসন্ধানত তালাচী অভিযান চলি আছে। ইয়াৰ বাবে সমগ্ৰ চহৰখন বন্ধ কৰি দিয়া হৈছে। আৰক্ষী আৰু সেনাই যুটীয়াভাৱে ঘৰে ঘৰে তালাচী চলাই আছে। ইয়াৰ আগতেও একনায়ক কিম জং উনে বহু অদ্ভুত আদেশ জাৰি কৰিছিল।
Continue Reading
