ডিজিটেল ডেস্কঃবিশ্বৰ বিভিন্ন দেশত এতিয়া কোভিডৰ নতুন ঢৌ আহিছে। অৱশ্যে আৰম্ভনিৰ তুলনাত কোভিডৰ শেহতীয়া ঢৌ সমূহৰ শক্তি যেন ভালে খিনি হ্ৰাস পাইছে।ভাৰততো দৈনিক আক্ৰান্ত ৰোগীৰ সংখ্যা কিছু কমিছে যদিও কোভিডৰ আতংকৰ পৰা এতিয়াও দেশ খন মুক্ত হ’বলৈ যেন বহু বাকী।যোৱা ২৪ ঘণ্টাত, দেশত কোভিডত আক্ৰান্ত লোকৰ সংখ্যা ১০,০০০ তললৈ হ্ৰাস পাইছে, মৃত্যুৰ সংখ্যাও অলপ কমিছে।
কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি, দেশত বিগত ২৪ ঘণ্টাত আক্ৰান্ত ৰোগীৰ সংখ্যা হৈছে ৯,৫৩১ গৰাকী। যোৱা ২৪ ঘণ্টাত, দেশত কোভিডত আক্ৰান্ত হৈ ৩৬ জন লোকৰ মৃত্যু হৈছে।
একেৰাহে যোৱা চাৰিদিন ধৰি, দেশত কোভিডৰ দৈনিক সংক্ৰমণ ১০,০০০ ৰ ওপৰত আছিল৷ কিন্তু যোৱা ২৪ ঘণ্টাত, ই ১০,০০০-ৰ তললৈ নামিছে। কেন্দ্ৰীয় স্বাস্থ্য মন্ত্ৰালয়ৰ কোভিড বুলেটিন অনুসৰি যোৱা ২৪ ঘণ্টাত মহাৰাষ্ট্ৰ এতিয়াও দৈনিক সংক্ৰমণৰ শীৰ্ষত আছে। যোৱা ২৪ ঘণ্টাত, মহাৰাষ্ট্ৰত ১,৮৩২ গৰাকী লোক কোভিডত আক্ৰান্ত হৈছে।
ইয়াৰ পিছত আছে কেৰালা (১,০৮৯), দিল্লী (৯৪২) আৰু কৰ্ণাটক (৭২০)।কেন্দ্ৰীয় স্বাস্থ্য মন্ত্ৰালয়ৰ কোভিড বুলেটিন অনুসৰি, যোৱা ২৪ ঘণ্টাত কোভিডত ৩৬ জন লোকৰ মৃত্যু হৈছে। পশ্চিম বংগ আৰু ৰাজস্থানত চাৰিজন , মহাৰাষ্ট্ৰ, কৰ্ণাটক, উত্তৰ প্ৰদেশ, হাৰিয়ানা, পঞ্জাৱ, হিমাচল প্ৰদেশ আৰু মণিপুৰত দুজনকৈ লোকৰ মৃত্যু ঘটিছে। ছত্তীশগড়, মেঘালয়, মধ্য প্ৰদেশ আৰু উৰিষ্যাত এজনকৈ লোকৰ মৃত্যু হোৱাৰ খবৰ পোৱা গৈছে। দেওবাৰে, মৃত্যুৰ সংখ্যা আছিল ৪৩। এতিয়ালৈকে, দেশত কোভিডত আক্ৰান্ত হৈ ৫লাখ ২৯ হাজাৰ ৯৩১ জন লোকৰ মৃত্যু হৈছে।
যোৱা ২৪ ঘণ্টাত দেশত দৈনিক সংক্ৰমণৰ হাৰ ৪.১৫ শতাংশ হৈছে। দেওবাৰে দৈনিক ইতিবাচকতাৰ হাৰ আছিল ৩.৭৫ শতাংশ। ইতিবাচকতাৰ হাৰ বা সংক্ৰমণৰ হাৰ হৈছে কোভিডৰ ইতিবাচক পৰীক্ষাৰ ফলাফল অহা লোকৰ শতাংশ হাৰ। কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি, যোৱা ২৪ ঘণ্টাত ১১,৭২৬ গৰাকী লোক কোভিডৰ পৰা আৰোগ্য হৈছে। দেশজুৰি ৪ কোটি ৩৭ লাখ ২৩ হাজাৰ ৯৪৪ জন লোক এতিয়ালৈকে কোভিডৰ পৰা আৰোগ্য লাভ কৰিছে ৷ বৰ্তমানআৰোগ্যৰ হাৰ হৈছে ৯৮.৫৯ শতাংশ। এতিয়ালৈকে, দেশত ২১০ কোটি ২ লাখ ৪০হাজাৰ ৩৬১ টা ভেকচিন প্ৰদান কৰা হৈছে।
Continue Reading
