ডিজিটেল ডেস্ক: আফগানিস্তানত এতিয়া ভোকত কলমলাইছে শিশু৷ দৰিদ্ৰতাই ছানি ধৰিছে তালিবান অধ্যুষিত ৰাষ্ট্ৰখনৰ সামাজিক পৰিকাঠামোক৷ নিৰাশাই খেদি ফুৰিছে আফগানসকলক৷ আফগানিস্তানৰ সমস্যাজৰ্জৰ অৰ্থনীতিত পুঁজিৰ অভাৱৰ ফলত দিনে দিনে বৃদ্ধি পাইছে দৰিদ্ৰতা৷ ৰাষ্ট্ৰসংঘই সতৰ্ক কৰি দিছে যে প্ৰায় ২৩ নিযুত আফগান, মুঠ জনসংখ্যাৰ প্ৰায় ৫৫ শতাংশ লোকে দিন যাপন কৰিছে ক্ষুধাত৷ প্ৰায় ৯ নিযুত লোক দুৰ্ভিক্ষৰ মুখামুখি হোৱাৰ আশংকাত কৰিছে ৰাষ্ট্ৰসংঘই৷
-
কেনে আছে আফগানিস্তানৰ দাৰিদ্ৰ্যপীড়িত শিশুবোৰ?
আফগানিস্তানত এতিয়া প্ৰচণ্ড শীতত শিশুবোৰ আবদ্ধ হৈ আছে অস্থায়ী শিবিৰত৷ আনহাতে চিকিৎসালয়ত থকা অসুস্থ শিশুবোৰ তেওঁলোকৰ মাতৃৰ বোৰ্খাৰে মেৰিয়াই থোৱা আছে। ইফালে, দেশখনে এনে নিৰাশাজনক সময়ত চূড়ান্ত পৰ্যায়ত বিপৰ্যস্ত হোৱাৰ লগে লগে খাদ্য বিতৰণ কেন্দ্ৰসমূহত দেখা গৈছে দীঘল শাৰী৷ এমুঠি অন্নৰ বাবে আৰ্তনাদত চিঞৰি উঠিছে অবোধ আফগান শিশুবোৰ৷
যোৱা বছৰৰ ১৫ আগষ্টত কাবুলত তালিবানৰ অধিগ্ৰহণৰ পাছৰে পৰা ইতিমধ্যেই যুদ্ধবিধ্বস্ত
অৰ্থনীতিয়ে দেশখনক এসময়ত কেৱল আন্তৰ্জাতিক অনুদানৰ দ্বাৰা জীয়াই ৰাখিছিল৷ এতিয়া ৰুদ্ধ হৈ পৰিছে সেই পথো৷ চিকিৎসালয়ৰ বাবে নাই পৰ্যাপ্ত ধন৷ অইন আফগান নাগৰিকৰ দৰে এগৰাকী আফগান মহিলা ছালিহাই তেওঁৰ নৱজাতক পুত্ৰক কাবুলৰ ইন্দিৰা গান্ধী শিশু চিকিৎসালয়লৈ লৈ গৈছিল। দুৰ্বল আৰু ভগ্নস্বাস্থ্যৰ চাৰিমহীয়া নাজিব পুষ্টিহীনতাত আক্ৰান্ত আছিল৷ আফগানিস্তানৰ বহুতো দৰিদ্ৰ লোকৰ বাবে এতিয়া এখন পিঠাই হৈছে তেওঁলোকৰ প্ৰধান খাদ্য৷ মহিলা আৰু শিশুসকলে সূৰ্য উদয়ৰ পাছৰে পৰা বেকাৰীৰ বাহিৰত এখন পিঠা পাবলৈ শাৰী পাতি থাকে।
বিশ্ব স্বাস্থ্য সংস্থায়ো লাখ লাখ আফগান শিশু পুষ্টিহীনতাত ভুগি থকাৰ কথা সদৰি কৰিছে৷
আফগানিস্তানৰ পূৰ্বৰ চৰকাৰৰ বাজেটৰ প্ৰায় ৮০ শতাংশ ধন আহিছিল আন্তৰ্জাতিক সম্প্ৰদায়ৰ পৰা। সেই ধন এতিয়া কৰ্তন কৰা হৈছে৷ নিষেধাজ্ঞাই বেংকসমূহক দেউলিয়া কৰি তুলিছে, আনহাতে আফগানিস্তানৰ বিলিয়ন ডলাৰৰ পুঁজি আৰু সম্পত্তি বিদেশত সঞ্চিত হৈ আছে৷ ৰাষ্ট্ৰসংঘৰ তথ্য অনুসৰি, ৰাষ্ট্ৰসংঘই তালিবান চৰকাৰক উপেক্ষা কৰি আফগানসকলক কেনেকৈ মানৱীয় সাহায্য প্ৰদান কৰিব পাৰে, তাৰ উপায় বিচাৰি আছে।
