কথক নৃত্যশিল্পী বিৰজু মহাৰাজৰ মৃত্যু: দেশজুৰি শোকৰ ছাঁ

ডিজিটেল ডেস্ক: কিংবদন্তী কথক নৃত্যশিল্পী পণ্ডিত বিৰজু মহাৰাজৰ কালি দেহাৱসান ঘটে৷ মৃত্যুৰ সময়ত তেওঁৰ বয়স আছিল ৮৩ বছৰ৷ কথক নৃত্যশিল্পীগৰাকীৰ মৃত্যুৰ বাতৰি বিয়পি পৰাৰ লগে লগে তেওঁৰ অনুৰাগী আৰু শিষ্যসকল শোকত ম্ৰিয়মাণ হৈ পৰা দেখা গৈছে৷ বিৰজু মহাৰাজক তেওঁৰ শিষ্য আৰু অনুগামীসকলে পণ্ডিতজী বা মহাৰাজজী অভিধাৰে অভিহিত কৰিছিল৷ ভাৰতৰ প্ৰখ্যাত কথক নৃত্যশিল্পীগৰাকী দেওবাৰে দিল্লীস্থ তেওঁৰ বাসভৱনত হৃদৰোগত আক্ৰান্ত হৈছিল। দেশৰ দ্বিতীয় সৰ্বোচ্চ অসামৰিক বঁটা ‘পদ্মবিভূষণ’প্ৰাপক মহাৰাজৰ মৃত্যুৱে দেশজুৰি শোকৰ ছাঁ পেলাইছে৷ খবৰ অনুসৰি, বিৰজু মহাৰাজে দেওবাৰে নিশা তেওঁৰ নাতিৰ সৈতে খেলি আছিল, যেতিয়া তেওঁৰ স্বাস্থ্যৰ অৱনতি ঘটিছিল আৰু তেওঁ অজ্ঞান হৈ পৰিছিল। তেওঁক চিকিৎসালয়লৈ লৈ যোৱা হৈছিল যদিও চিকিৎসকে তেওঁক মৃত বুলি ঘোষণা কৰে৷ বিৰজু মহাৰাজৰ নাতিনী ৰাগিণী মহাৰাজে কয়, তেওঁ যোৱা এমাহ ধৰি চিকিৎসাধীন আছিল। যোৱা নিশা প্ৰায় ১২:১৫-১২:৩০ বজাত তেওঁৰ হঠাতে শ্বাসকষ্ট হৈছিল, আমি তেওঁক ১০ মিনিটৰ ভিতৰত চিকিৎসালয়লৈ লৈ আহিছিলোঁ, কিন্তু তেওঁৰ মৃত্যু হৈছিল৷ কিংবদন্তী কথক নৃত্যশিল্পীগৰাকী এজন খ্যাতনামা ঢোলবাদকো আছিল, প্ৰায় সকলো ড্ৰাম সহজে আৰু নিখুঁতভাৱে বজাইছিল৷ তেওঁৰ অফিচিয়েল ৱেবছাইটৰ তথ্য অনুসৰি তেওঁ বিশেষকৈ তবলা আৰু নাল বজাবলৈ ভাল পাইছিল। এগৰাকী কণ্ঠশিল্পীও আছিল বিৰজু মহাৰাজ৷ থুমৰী, দাদৰা, ভজন আৰু গজলৰ ওপৰত তেওঁৰ প্ৰতিভাৰ পোহৰ পৰিছিল৷ তেওঁৰ মৃত্যুত সংগীতশিল্পী আদান স্বামীয়ে টুইট কৰিছে এইদৰে, ‘কিংবদন্তী কথক নৃত্যশিল্পী-পণ্ডিত বিৰজু মহাৰাজজীৰ মৃত্যুৰ বাতৰিত অত্যন্ত দুখিত। আমি প্ৰদৰ্শন কলাৰ ক্ষেত্ৰত এটা অতুলনীয় প্ৰতিষ্ঠান হেৰুৱালোঁ। তেওঁ তেওঁৰ প্ৰতিভাৰ জৰিয়তে বহু প্ৰজন্মক প্ৰভাৱিত কৰিছে। তেওঁ শান্তিত থাকক৷’ চিনেমা নিৰ্মাতা অশোক পণ্ডিতে ভাৰতে এটি ৰত্ন হেৰুৱালে বুলি মন্তব্য কৰিছে৷