ক'ভিডৰ সংক্ৰমণ বৃদ্ধি ! ৬দিনত নিৰ্মাণ ৬,০০০ বিচনাযুক্ত চিকিৎসালয়

ডিজিটেল ডেস্ক : চীনত পুনৰ বৃদ্ধি পাইছে ক'ভিডৰ প্ৰকোপ৷ বিগত কেইদিনমানত চীনত ক'ভিড ৰোগীৰ সংখ্যা বৃদ্ধিলৈ লক্ষ্য কৰি নিৰ্মাণ কৰিছে চিকিৎসালয় ৷ চীনত দেওবাৰে ৩,৩৯৩ টা নতুন ক'ভিড-১৯ ৰোগী ধৰা পৰাৰ তথ্য প্ৰকাশ কৰিছে ৰাষ্ট্ৰীয় স্বাস্থ্য আয়োগে৷ দেশখনে দুবছৰত ক'ভিডৰ প্ৰাদুৰ্ভাৱৰ সন্মুখীন হোৱাৰ পাছত এই সংক্ৰমণ যথেষ্ট বৃদ্ধি পাইছে৷ চীন কৰ্তৃপক্ষই জিলিন চহৰত এখন অস্থায়ী চিকিৎসালয় নিৰ্মাণৰ কাম চলাই আছে। ছিনহুয়াৰ বাতৰি অনুসৰি, ৬,০০০ বিচনাৰে এই চিকিৎসালয়খন ছদিনৰ ভিতৰত সম্পূৰ্ণ হোৱাৰ সম্ভাৱনা আছে। দেশখনৰ উত্তৰ-পূবৰ জিলিন প্ৰদেশত সোমবাৰে একেৰাহে দ্বিতীয় দিনৰ বাবে ১,০০০ তকৈও অধিক নতুন ক'ভিড ৰোগী চিনাক্ত কৰা হৈছে। দেশজুৰি ক'ভিড ৰোগী বৃদ্ধিৰ ফলত কৰ্তৃপক্ষই ছাংহাইৰ বিদ্যালয়সমূহ বন্ধ ঘোষণা কৰিছে আৰু উত্তৰ-পূবৰ কেইবাখনো চহৰ বন্ধ কৰি দিছে৷ কিয়নো প্ৰায় ১৯ খন প্ৰদেশই অ'মিক্ৰন আৰু ডেল্টা ভাইৰাছৰ দ্বাৰা আক্ৰান্ত হৈছে। ৰাজ্যিক সংবাদ মাধ্যমৰ বাতৰি অনুসৰি জিলিন চহৰখন আংশিকভাৱে বন্ধ কৰি দিয়া হৈছে৷ চৰকাৰী ঘোষণা অনুসৰি জিলিন প্ৰদেশৰ সৰু চহৰ চিপিং আৰু ডুনহুয়া বৃহস্পতিবাৰে আৰু শুক্ৰবাৰে বন্ধ ঘোষণা কৰা হৈছিল।