ডিজিটেল ডেস্কঃ লাডাখত চীনৰ সেনাই চলোৱা আগ্ৰাসনক কেন্দ্ৰ কৰি ভাৰত আৰু চীনৰ মাজত উত্তেজনা অব্যাহত থকাৰ মাজতে শুকুৰবাৰে অৰ্থাৎ কাইলৈ প্ৰথমবাৰৰ বাবে মুখামুখী হ’ব ভাৰতৰ প্ৰধানমন্ত্ৰী নৰেন্দ্ৰ মোদী আৰু চীনৰ ৰাষ্ট্ৰপতি ঝি জিনপিং।২০২০ চনত এছিয়াৰ দুখন শক্তিশালী দেশৰ মাজত আৰম্ভ হোৱা সংঘতাৰ পিছত এয়া হ’ব দেশ দুখনৰ শীৰ্ষ ৰাজনীতিকৰ প্ৰথম সাক্ষাৎ।
উজবেকিস্তানৰ চহৰ চামাৰ্কন্দত অনুষ্ঠিত হোৱা ছাংহাই সহযোগিতা সংস্থা (এছচিঅ') ৰ আঞ্চলিক সুৰক্ষা গোটৰ এখন সন্মিলনত ভাগ ল’বলৈ প্ৰধানমন্ত্ৰী মোডীয়ে বৃহস্পতিবাৰে উজবেকিস্তানলৈ গৈছে। সন্মিলনৰ সময়তে মোদীয়ে চীনৰ ৰাষ্ট্ৰপতি ঝি জিনপিং আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে সুকীয়া সুকীয়াকৈ বৈঠকত মিলিত হ’ব।
প্ৰধানমন্ত্ৰীয়ে কাৰ্যালয়ে এই প্ৰসংগত কয়, "এছচিঅ' সন্মিলনত মই সাময়িক, আঞ্চলিক আৰু আন্তঃৰাষ্ট্ৰীয় বিষয়, এছচিঅ'ৰ সম্প্ৰসাৰণ আৰু সংগঠনটোৰ ভিতৰত বহুমুখী আৰু পাৰস্পৰিক ভাৱে লাভজনক সহযোগিতা অধিক বৃদ্ধি কৰাৰ ক্ষেত্ৰত মত বিনিময় কৰিম।"তেওঁ লগতে কয় যে সন্মিলনখনত বাণিজ্য, অৰ্থনীতি, সংস্কৃতি আৰু পৰ্যটনৰ ক্ষেত্ৰত কেইবাটাও সিদ্ধান্ত লোৱা হ'ব বুলি আশা কৰা হৈছে।
উল্লেখ্য লাডাখকলৈ অচলাৱস্থা আৰম্ভ হোৱাৰ পিছৰে পৰা মোদী আৰু জিনপিঙে ইজনে সিজনৰ সৈতে আনুষ্ঠানিকভাবে কথা পতা নাই।লাডাখত চীনৰ সেনাই আগ্ৰাসন চলোৱাক লৈ বিগত কিছু বছৰ ধৰি ভাৰত আৰু চীনৰ মাজত সংঘাত অব্যাহত আছে। এনে সংঘাতৰ পৰিণতিতে কুৰি জনকৈ ভাৰতীয় সেনাৰ প্ৰাণো গৈছে। ইয়াৰ মাজতে ভাৰত আৰু চীনৰ মাজত লাডাখ সংকটকলৈ ১৬ লানি আলোচনা অনুষ্ঠিত হৈছে। শেহতীয়া আলোচনামৰ্মে দুয়োখন দেশে পূব লাডাখৰ গোগ্ৰা আৰু হট স্প্ৰিং অঞ্চলৰ পৰা সৈন্য প্ৰত্যাহাৰ কৰা আৰম্ভ কৰিছে।
প্ৰতিৰক্ষা মন্ত্ৰালয়ে প্ৰকাশ কৰা মতে দুয়োখন দেশৰ মাজত অনুষ্ঠিত ১৬ সংখ্যক বৈঠকত হোৱা সহমতৰ ভিত্তিত সৈন্য প্ৰত্যাহাৰৰ সিদ্ধান্ত লোৱা হৈছে। ২০২০ চনৰ ১৫ জুনত পূব লাডাখৰ গালোৱান উপত্যকাত ভাৰতীয় সেনা আৰু চীনা সেনাৰ (পিএলএ) মাজত এক ৰক্তক্ষয়ী সংঘৰ্ষ হৈছিল। পৰৱৰ্তী পৰ্যায়ত, উত্তেজনা হ্ৰাস কৰিবলৈ সামৰিক আৰু কূটনৈতিক পৰ্যায়ত আলোচনা আৰম্ভ হয়। আলোচনাৰ আধাৰত দুয়োখন দেশে সৈন্যৰ সংখ্যা হ্ৰাস কৰাৰ সিদ্ধান্ত লয়।অৱশ্যে বহু লানি আলোচনাৰ পিছতো চীনে লাডাখৰ পৰা সেনা আঁতৰাই নিয়া নাছিল।
দুয়োখন দেশে শেহতীয়াকৈ এক যুটীয়া বিবৃতিত কয়, "শেহতীয়া ১৬ লানি বৈঠকৰ আধাৰত গোগ্ৰা-হটস্প্ৰিং (পেট্ৰলিং পইণ্ট-১৫)ৰ পৰা পৰিকল্পিত ভাৱে সৈন্য প্ৰত্যাহাৰ আৰম্ভ হৈছে।" দুয়োপক্ষই আশা ব্যক্ত কৰে যে এই পদক্ষেপে সীমান্ত অঞ্চলত শান্তি বৰ্তাই ৰখাত সহায় কৰিব।লাডাখ প্ৰসংগত দুয়োখন দেশৰ ইতিবাচক পদক্ষেপে এছচিঅ'ত একেখন মঞ্চত উপস্থিত থকা দুয়োখন দেশৰ নেতাৰ মাজত বৈঠক অনুষ্ঠিত হোৱাৰ সম্ভাৱনা বৃদ্ধি কৰিছে।কূটনৈতিক সূত্ৰৰ মতে মোদী আৰু জিনপিঙে কিছু সময়ৰ বাবে লাডাখ সমস্যাকলৈ আলোচনা কৰাৰ সম্ভাৱনা আছে।
Continue Reading
