ডিজিটেল ডেস্কঃ কুখ্যাত সন্ত্ৰাসবাদী সংগঠন আল-কায়েদাৰ নতুন মুৰব্বী হিচাপে নিযুক্তি দিয়া হৈছে সংগঠনটোৰ কমাণ্ডো ছাইফ আল-আদেলক। বৰ্তমান ইৰাণত বসবাস কৰা আল-আদেলে ইজিপ্তত জন্মগ্ৰহণ কৰিছিল।
আমেৰিকা যুক্তৰাষ্ট্ৰৰ বৈদেশিক পৰিক্ৰমা মন্ত্ৰালয়ে বুধবাৰে এই কথা সদৰী কৰিছে। যোৱা বছৰ জুলাইত আমেৰিকা যুক্তৰাষ্ট্ৰৰ ড্ৰোণ আক্ৰমণত নিহত হৈছিল আল-কায়দাৰ মুৰব্বী আয়মান আল-জাৱাহিৰী। তেওঁৰ স্থানত আল-আদেলক দায়িত্ব দিয়া হৈছে বুলি আমেৰিকা যুক্তৰাষ্ট্ৰই জানিব পাৰিছে।
আমেৰিকাৰ বিদেশ বিভাগৰ এজন মুখপাত্ৰই কয়, “আমাৰ পৰ্যৱেক্ষণসমূহ ৰাষ্ট্ৰসংঘৰ পৰ্যৱেক্ষণৰ সৈতে সামঞ্জস্যপূৰ্ণ। ধাৰণা কৰা হৈছে যে ছাইফ আল-আদেল আল-কায়েদাৰ নতুন মুৰব্বী হৈছে। তেওঁ ইৰাণত আছে।‘’
অৱশ্যে, আল-কায়েদাৰ পৰা ইয়াৰ নতুন মুৰব্বীৰ নিৰ্বাচন সম্পৰ্কে কোনো আনুষ্ঠানিক ঘোষণা কৰা হোৱা নাই। ইণ্টাৰনেচনেল চেণ্টাৰ ফৰ টেৰৰিজম (আইচিচিটি)ৰ মতে, ইজিপ্তৰ বংশোদ্ভূত ৬২ বছৰীয়া ছাইফ আল-আদেলৰ অভিযান সম্পৰ্কীয় কামৰ বাবে পৰিকল্পনাৰ ব্যাপক অভিজ্ঞতা আছে।
ছাইফ আল-আদেলক মুহাম্মাদ ইব্ৰাহিম মাক্কি আৰু ইব্ৰাহিম আল-মাদানী বুলিও জনা যায়। তেওঁ ইতিমধ্যে ইৰাণ এৰি আফগানিস্তানলৈ গৈছে বুলিও বাতৰি ওলাইছে।
Continue Reading
