ডিজিটেল ডেস্কঃ লিফ্টত উঠোতে সাৱধান। সময়ে সময়ে লিফ্টত দুৰ্ঘটনা সংঘটিত হোৱাৰ খবৰ পঢ়িবলৈ পোৱা যায়। আজিকালি ডাঙৰ ডাঙৰ বিল্ডিঙত লিফ্ট থাকেই। মানুহেও চিৰি বগাবলৈ টান পাই লিফ্টৰ সুবিধা গ্ৰহণ কৰে। বিজ্ঞান-প্ৰযুক্তিবিদ্যাৰ কিছুমান উদ্ভাৱন আমাৰ বাবে আশীৰ্বাদ যদিও কেতিয়াবা যেন সেই আশীৰ্বাদেই আমাৰ বাবে অভিশাপ হৈ পৰে। শেহতীয়াকৈ সংঘটিত হোৱা দুটাকৈ লিফ্টৰ দুৰ্ঘটনাই মানুহক চিন্তিত কৰি তুলিছে।
শুকুৰবাৰে মুম্বাইৰ মালাদৰ এখন বিদ্যালয়ত লিফ্টত আবদ্ধ হৈ মৃত্যুক সাৱটি লয় জেনেল ফাৰ্ণাণ্ডেজ নামৰ ২৬ বছৰীয়া শিক্ষয়িত্ৰীগৰাকীয়ে। লিফ্টত গুৰুতৰভাৱে আহত জেনেল ফাৰ্ণাণ্ডেজক এখন ব্যক্তিগত চিকিৎসালয়ত ভৰ্তি কৰোৱা হয় যদিও চিকিৎসালয়ত তেওঁক মৃত বুলি ঘোষণা কৰা হয়। মুম্বাইৰ মালাদ পশ্চিমৰ চিনচোলী গেটৰ সমীপত অৱস্থিত ছেইণ্ট মেৰীজ ইংৰাজী বিদ্যালয়ত সংঘটিত হৈছে এই ঘটনা।
বিদ্যালয় ভৱনৰ ষষ্ঠ মহলাত দুপৰীয়া এক বজাত জেনেলে ক্লাছ শেষ কৰি দ্বিতীয় মহলাত অৱস্থিত ষ্টাফ ৰুমলৈ যাব বিচাৰিছিল। গতিকে লিফ্টত উঠি তেওঁ লিফ্টৰ বুটাম টিপিলে। কিন্তু লিফ্টৰ দুৱাৰ বন্ধ হোৱাৰ আগতেই লিফ্ট ওপৰলৈ গতি কৰিলে। এনে অৱস্থাত তেওঁৰ এখন ভৰি লিফ্টৰ বাহিৰত আৰু আনখন ভৰি ভিতৰত থাকিল। এটা ভৰি লিফ্টত থ’লে যদিও শৰীৰটো সম্পূৰ্ণৰূপে প্ৰৱেশ কৰাৰ আগতে লিফ্টখন চলিবলৈ আৰম্ভ কৰে। এনে হোৱাৰ বাবে শিক্ষয়িত্ৰীগৰাকী লিফ্ট আৰু লিফ্টৰ কাষৰ বেৰৰ মাজত আবদ্ধ হৈ পৰে। লিফ্টত আবদ্ধ হোৱাৰ পিছত তেওঁ সহায়ৰ বাবে চিঞৰিছিল। চিঞৰ শুনি স্কুলৰ শিক্ষক আৰু কৰ্মচাৰীসকলে লিফ্টৰ ফালে দৌৰি গ’ল, তেতিয়ালৈকে জেনেল ফাৰ্ণাণ্ডেজ গুৰুতৰভাৱে আঘাতপ্ৰাপ্ত হৈছিল। লগে লগে তেওঁক বিদ্যালয়ৰ কৰ্মচাৰীয়ে ওচৰৰ লাইফলাইন হাস্পতাললৈ লৈ যায় কিন্তু চিকিৎসালয়খনৰ চিকিৎসকে পৰীক্ষা কৰি তেওঁক মৃত বুলি ঘোষণা কৰে।
ইয়াৰ লগতে গুজৰাটৰ চুৰাটতো ভয়ংকৰ ঘটনা সংঘটিত হৈছে৷ চুৰাটৰ পাণ্ডেচাৰা অঞ্চলৰ বামৰোলীত ১৪ মহলা অট্টালিকাৰ লিফ্ট মেৰামতি কৰোঁতে লিফ্টসহ বাগৰি অহা ২ গৰাকী লোকৰ মৃত্যু হয় আৰু 8 গৰাকী লোক গুৰুতৰভাৱে আহত হয়।
Continue Reading
