ডিজিটেল ডেস্কঃ ভূপালত লিভ-ইনত থকা এগৰাকী বিউটিচিয়ানৰ সন্দেহজনক পৰিস্থিতিত মৃত্যু হৈছে। বিউটিচিয়ানগৰাকী ছিকিমৰ বুলি জানিব পৰা গৈছে। যুৱতীগৰাকীৰ মৃতদেহত কাঁচ আৰু চুৰীৰ আঘাত দেখিবলৈ পোৱা গৈছে। তেওঁৰ প্ৰেমিকগৰাকীয়ে এয়া আত্মহত্যা বুলি অভিহিত কৰিছে। এনে অৱস্থাত এয়া হত্যা নে আত্মহত্যা তাৰ তদন্ত আৰম্ভ কৰিছে আৰক্ষীয়ে।
অতিৰিক্ত ডিচিপি ৰাজেশ ভদৌৰিয়াই কয়, ‘বিউটিচিয়ান প্ৰেমা লাম্বা তামাং মূলতঃ ছিকিমৰ আছিল। এমাহ ধৰি ভূপালৰ ল’ৰা এটাৰ লগত তেওঁ লিভ-ইনত আছিল।’’ আৰক্ষীয়ে কৰা জেৰাত মৃত ছোৱালীজনীৰ প্ৰেমিকজনে কয়, "শনিবাৰে নিশা আমি দুয়ো মদ খাইছিলো। ইফালে মোৰ ম'বাইলত আন এগৰাকী ছোৱালীৰ ফোন আহিল আৰু মই তাইৰ লগত কথা পাতিবলৈ ধৰিলোঁ। এই কথাটোকে লৈ তেওঁ মোৰ লগত কাজিয়া কৰে। প্ৰেমাই মোক আক্ৰমণো কৰিছিল আৰু ঘৰৰ বস্তুবোৰ দলিয়াই ভাঙি পেলাইছিল। নিচাৰ কোবত প্ৰেমা অনিয়ন্ত্ৰিত হৈ পৰিছিল।"
লগতে প্ৰেমিকজনে কয়, “ফোনত কথা পাতি থাকোঁতে মই আন এটা ৰুমলৈ গুচি গৈছিলোঁ। অলপ পিছত যেতিয়া মই ওলাই আহি দেখো যে, কাঁচৰ বটল আৰু চুৰীৰে প্ৰেমাই নিজকে আঘাত কৰিছিল। প্ৰেমাক চিকিৎসালয়লৈ লৈ যাও যদিও চিকিৎসাৰ সময়তে তেওঁৰ মৃত্যু হয়।’’
উল্লেখ্য যে প্ৰেমাই আগতে ৰোহিত নগৰৰ এখন বিউটি পাৰ্লাৰত কাম কৰিছিল। ছ’চিয়েল মিডিয়াৰ জৰিয়তে শ্বাহদলৰ বাসিন্দা হৰ্ষ কেশৰৱানীৰ সৈতে বন্ধুত্ব গঢ় লৈ উঠিছিল প্ৰেমাৰ। ইয়াৰ পিছত দুয়োৰে মাজত প্ৰেমৰ সম্পৰ্ক হৈছিল। শেহতীয়াকৈ দুয়োজনে ইন্দ্ৰপুৰী অঞ্চলত ভাড়াতীয়া ফ্লেট এটা লৈ লিভ-ইনত থাকিবলৈ আৰম্ভ কৰিছিল। বৰ্তমান আৰক্ষীয়ে বিষয়টোৰ তদন্ত অব্যাহত ৰাখিছে। পোষ্টমৰ্টেমৰ ৰিপ’ৰ্ট পোৱাৰ পাছতহে পৰৱৰ্তী তদন্তৰ সিদ্ধান্ত ল’ব আৰক্ষীয়ে।
Continue Reading
