ডিজিটেল ডেস্ক: লোকসভা নিৰ্বাচনৰ পূৰ্বে জনতা দল ইউনাইটেডৰ কেন্দ্ৰীয় সমিতিত বৃহৎ পৰিৱৰ্তন দেখিবলৈ পোৱা গৈছে৷ দিল্লীত দলৰ কাৰ্যকৰী বৈঠকত ৰাজীৱ ৰঞ্জন ওৰফে লালন সিঙে পদৰ পৰা পদত্যাগপত্ৰ প্ৰদান কৰাৰ পাছত বিহাৰৰ মুখ্যমন্ত্ৰী নীতিশ কুমাৰক জনতা দল (ইউনাইটেড)ৰ নতুন সভাপতি হিচাপে মনোনীত কৰা হৈছে।
নেতৃত্বৰ সম্ভাৱ্য পৰিৱৰ্তন সম্পৰ্কে জেডিইউ নেতা আৰু সহযোগীসকলৰ পৰা কেইবাসপ্তাহধৰি চলি থকা পূৰ্বানুমান পাছত আজিৰ এই ঘোষণা বিশেষভাৱে তাৎপৰ্যপূৰ্ণৰূপে বিবেচিত হৈছে৷
লালন সিঙে তেওঁৰ ভাষণত পদ ত্যাগ কৰাৰ কাৰণ হিচাপে আগন্তুক নিৰ্বাচনত অধিক গুৰুত্ব দিব আৰু সক্ৰিয়ভাৱে অংশগ্ৰহণ কৰিব বিচাৰিছে বুলি উল্লেখ কৰে। তাৰ পাছতে তেওঁ নীতিশ কুমাৰক দলত তেওঁৰ উত্তৰাধিকাৰী হিচাপে প্ৰস্তাৱ দিয়ে৷
জেডিইউৰ সাধাৰণ সম্পাদক ৰাম কুমাৰ শৰ্মাই কয়, লালন সিঙে প্ৰথমে পদত্যাগৰ প্ৰস্তাৱ দিছিল আৰু ইয়াক গ্ৰহণ কৰা হৈছিল। একেসময়তে, নীতিশ কুমাৰ পৰৱৰ্তী সভাপতি হ‘ব বুলি উত্থাপিত প্ৰস্তাৱ গৃহীত হয়।
বিহাৰৰ প্ৰাক্তন মুখ্যমন্ত্ৰী জিতন ৰাম মাঁঝিয়ে নেতৃত্ব পৰিৱৰ্তনৰ পাছত নীতিশ কুমাৰক তৎক্ষণাৎ সমালোচনা কৰিছে। এক্স (পূৰ্বতে টুইটাৰ)ত এটা পোষ্টত তেওঁ কয়, নীতিশ কুমাৰৰ তিনিবছৰীয়া পৰিকল্পনাৰ অধীনত লালন সিঙকো নিশ্চিহ্ন কৰা হৈছে।
বিহাৰ বিধানসভাৰ বিৰোধী দলপতি বিজয় সিনহাই কয়, লালন সিঙৰ প্ৰস্থান অতি অপমানজনক আছিল। তেওঁ আগতে পদত্যাগ কৰিলে ভাল হ’লহেঁতেন।
নীতিশ কুমাৰৰ জেডিইউৰ সভাপতিত্বক হোৱা আলোচনাই ২০২৪ৰ লোকসভা নিৰ্বাচনৰ আগতে এক কৌশলগত অৱস্থানকে ইংগিত কৰিছে৷
Continue Reading
