ডিজিটেল ডেস্কঃ বিয়া পাতি সংসাৰৰ যাত্ৰা আৰম্ভ কৰিবলৈ নৌ পাওঁতেই দৰাৰ মৃত্যু। বিয়াৰ ৮ দিনৰ দিনা মৃত্যুক সাবটিলে দৰাই। উত্তৰ প্ৰদেশৰ ঝান্সীত ঘটিছে এই কৰুণ ঘটনা।
বিয়াৰ সাতদিন পিছতে ৰে’লে খুন্দা মৰাৰ ফলত দৰাজনৰ মৃত্যু হয়। ঝান্সী-কানপুৰ ৰে’লপথত পৰি থকা অৱস্থাত উদ্ধাৰ হয় তেওঁৰ মৃতদেহ। আত্মহত্যাৰ সন্দেহ কৰা হৈছে। অৱশ্যে আৰক্ষীয়ে তদন্ত অব্যাহত ৰাখিছে। জানিব পৰা মতে, যুৱকজনে দোকানলৈ যাম বুলি কৈ ৰাতিপুৱা ঘৰৰ পৰা ওলাই আহিছিল। কিন্তু ইয়াৰ পিছত তেওঁ ঘূৰি নাহিল। তেওঁৰ মোবাইলটোও চুইচ অফ হৈ আছিল।
সমগ্ৰ ঘটনাটো ঝান্সী জিলাৰ মান্থ থানা এলেকাৰ ভৰোছা গাঁৱৰ। ২১ বছৰীয়া শিৱম আহিৰৱাৰ পিতৃ-মাতৃৰ একমাত্ৰ পুত্ৰ আছিল। তেওঁৰ ডাঙৰ বায়েক সংগীতাৰ বিয়া হৈছে। দেউতাকে খেতি কৰে।
মৃতকৰ খুড়াক জয়প্ৰকাশে জনোৱা মতে, শিৱমে পানীপুৰীৰ কাম কৰিছিল। ১১ ডিচেম্বৰত দতিয়াৰ কালিপুৰা গাঁৱৰ বাসিন্দা কাজলৰ সৈতে তেওঁৰ বিবাহ হয়। বোৱাৰীজনী বিয়াৰ পিছত ঘৰত আছিল। ঘৰখনত সুখৰ পৰিবেশ বিৰাজ কৰিছিল। সকলো আনন্দত আছিল। কিন্তু বুধবাৰে পুৱা প্ৰায় ৯ বজাত শিৱমে দোকানৰ পৰা কিবা বস্তু আনিম বুলি ঘৰৰ পৰা ওলাই আহিল, আৰু তাৰ পিছত উভতি নাহিল। তেওঁৰ মোবাইলটো চুইচ অফ হৈ গ’ল।
সন্দেহ হোৱাৰ লগে লগে তেওঁৰ সন্ধান আৰম্ভ কৰা হয়। বিয়লি ৰে’লপথৰ সমীপত এজন যুৱকৰ মৃতদেহ পৰি থকা বুলি তথ্য লাভ কৰে পৰিয়ালে। মৃতদেহটো শিৱমৰ বুলি চিনাক্ত কৰা হয়। তথ্য পোৱাৰ লগে লগে পৰিয়ালটোত হাহাকাৰৰ সৃষ্টি হয়। নৱবিবাহিত কইনা কাজল অচেতন হৈ পৰিল।
সমগ্ৰ ঘটনা ৰহস্যৰ আৱৰ্তত সোমাই পৰিছে।
Continue Reading
