ডিজিটেল ডেস্কঃ বিশ্বপ্ৰসিদ্ধ পপ গায়ক মাইকেল জেকচনৰ জীৱনৰ ওপৰত আধাৰিত এখন ছবি নিৰ্মাণ হ’ব। মাইকেল জেকচনৰ আধাৰত নিৰ্মিত এই ছবিখনত তেওঁৰ ভতিজা জাফৰ জেকচনে মুখ্য চৰিত্ৰত অভিনয় কৰিব। সোমবাৰে ছচিয়েল মিডিয়াত এই কথা ঘোষণা কৰিছে জি কে ষ্টুডিঅ’ই। এই ছবিখন পৰিচালনা কৰিব এণ্টোৱান ফুকুৱাই, আনহাতে বিখ্যাত প্ৰযোজক গ্ৰেহাম কিঙে বায়’পিকখন প্ৰযোজনা কৰিব। দীৰ্ঘদিন ধৰি মাইকেলৰ চৰিত্ৰটোৰ বাবে প্ৰস্তুতি চলাই আহিছে জাফৰে।
মাইকেল জেকচনৰ এষ্টেট আৰু মনোৰঞ্জনৰ অধিবক্তা জন ব্ৰাংকাই ছ’চিয়েল মিডিয়াত এটা ভিডিঅ’ শ্বেয়াৰ কৰি প্ৰকাশ কৰিছে যে তেওঁৰ ভতিজা জাফৰক বায়’পিকখনত মাইকেলৰ চৰিত্ৰত অভিনয় কৰিবলৈ নিৰ্বাচিত কৰা হৈছে। ব্ৰাংকাই ভিডিঅ’টোত কয়- ‘মাইকেল জেকচনৰ জীৱনৰ আধাৰত নিৰ্মিত ছবিখনত জাফৰ জেকচনে মুখ্য চৰিত্ৰত অভিনয় কৰিব বুলি ঘোষণা কৰি আমি অতিশয় উৎসাহিত হৈছো। বিশেষ কথাটো হ’ল জাফৰ মাইকেল জেকচনৰ ভতিজা, মাইকেলৰ লগত তেওঁৰ বিশেষ সম্পৰ্ক আছে।
ব্ৰাংকাই লগতে কয়- ‘‘জাফৰক দেখিলে তেওঁৰ চকুত মাইকেলৰ আভাস এটা দেখা যায়। তেওঁৰ কণ্ঠ মাইকেলৰ লগত বহুত মিল আছে, এই ভূমিকাৰ বাবে তেওঁ যোৱা ৬ মাহ ধৰি কঠোৰ পৰিশ্ৰম কৰি আছে।’’
উল্লেখ্য যে জাফৰ জেকচন মাইকেল জেকচনৰ ডাঙৰ ভাতৃ জেৰমেইন জেকচনৰ পুত্ৰ, যি পেছাত এগৰাকী গায়ক আৰু প্ৰযোজক। দীৰ্ঘদিন ধৰি তেওঁ গায়ন-বায়ন আৰু চলচ্চিত্ৰ নিৰ্মাণৰ কাম কৰি আহিছে। সংবাদ মাধ্যমৰ সৈতে হোৱা কথা-বতৰাত মাইকেল জেকচনৰ ৯২ বছৰীয়া মাতৃ কেথেৰিন জেকচনে কয়- ‘‘জাফৰ মোৰ ল’ৰা মাইকেলৰে আন এক ৰূপ। তেওঁক মাইকেলৰ চৰিত্ৰত পৰ্দাত দেখাটো সঁচাকৈয়ে বিশেষ।’’
ইনষ্টাগ্ৰামত এই পোষ্টটো শ্বেয়াৰ কৰি জাফৰে লিখিছে- ‘‘মই অত্যন্ত সুখী আৰু গৌৰৱান্বিত যে মই মাইকেল খুড়াৰ কাহিনী বিশ্বৰ আগলৈ লৈ আহিম। বিশ্বৰ সকলো অনুৰাগীক এই কথা ক'ব বিচাৰিছো যে আমি অতি সোনকালে লগ পাম।’’
Continue Reading
