ডিজিটেল ডেস্কঃ দক্ষিণ কোৰিয়া অভিমুখী এছিয়ানা এয়াৰলাইন্সৰ এখন উৰন্ত বিমানৰ জৰুৰীকালীন দুৱাৰ খুলি গ্ৰেপ্তাৰ হৈছে এজন লোক। বিমানখন ডিয়েগো আন্তঃৰাষ্ট্ৰীয় বিমানবন্দৰত অৱতৰণ কৰাৰ সময়তো দুৱাৰখন খোলা আছিল।
আকাশৰ মাজত হঠাতে জৰুৰীকালীন দুৱাৰখন খোলাৰ ফলত বিমানখনৰ ভিতৰৰ বহু যাত্ৰী প্ৰচণ্ড বতাহৰ বাবে অজ্ঞান হৈ পৰিছিল।কিছুমান যাত্ৰীৰ উশাহ-নিশাহ লোৱাত কষ্ট অনুভৱ হয়। অসুস্থ আটাইকেইজন যাত্ৰীক চিকিৎসালয়লৈ স্থানান্তৰ কৰা হৈছে।
আৰক্ষীয়ে অভিযুক্তক গ্ৰেপ্তাৰ কৰিছে। ব্যক্তিজনৰ বয়স ৩০ বছৰ। জেজু দ্বীপৰ পৰা উৰা মৰা বিমানখন ভূপৃষ্ঠৰ পৰা ২৫০ মিটাৰ উচ্চতাত থকা সময়ত সংঘটিত হৈছিল এই ঘটনা।
বিমানখনৰ দায়িত্বত থকা কৰ্মীসকলে অৱতৰণৰ সময়ত লোকজনক ৰখাবলৈ চেষ্টা কৰে। প্ৰত্যক্ষদৰ্শীয়ে জনোৱা মতে, ব্যক্তিজনে বিমানখনৰ পৰা জপিয়াই যাবলৈ চেষ্টা কৰিছিল।এজন যাত্ৰীয়ে কয়, “দুৱাৰৰ ওচৰৰ যাত্ৰীসকল এজন এজনকৈ অজ্ঞান হৈ পৰিছিল।”
আৰক্ষীয়ে জনোৱা মতে, বিমানখনৰ দুৱাৰ খোলাৰ কোনো ধৰণৰ ব্যাখ্যা দিয়া নাই অভিযুক্তই। গ্ৰেপ্তাৰ হোৱাৰ সময়ত তেওঁ মদ্যপান কৰাৰ প্ৰমান নাছিল।
Continue Reading
