ডিজিটেল ডেস্কঃ বিশ্ব ঐতিহ্য ক্ষেত্র মানাহ ৰাষ্ট্ৰীয় উদ্যানে ৰাজ্যৰ পৰ্যটন ক্ষেত্ৰলৈ আশাৰ বতৰা কঢ়িয়াই আনিছে। ২০২৩-২৪ পৰ্যটন বৰ্ষত সাত মাহৰ ভিতৰত বৰ্তমানলৈ ১ কোটি ২০ লাখ টকাৰ ৰাজহ সংগ্রহ কৰে মানাহ ৰাষ্ট্ৰীয় উদ্যান কতৃপক্ষই।আজি মানাহৰ বাঁহবাৰীত সাংবাদিকৰে হোৱা বাৰ্তালাপত এই কথা জানিব দিয়ে মানাহৰ বাঁহবাৰী বনাঞ্চলৰ বন বিষয়া বাৰিন কুমাৰ বড়োৱে।
তেওঁ কয়, মানাহলৈ এইবাৰ যথেষ্ট সংখ্যক পৰ্যটকৰ আগমন ঘটিছে। ইয়াৰে ১,৬০০ গৰাকী বিদেশী পৰ্যটক আৰু ৪৬ হেজাৰ দেশী পৰ্যটক। তেওঁ লগতে কয়,মানাহৰ বাঁহবাৰী, ভূঞাপাৰা, পানবাৰী, কুকলুঙকে ধৰি আটাইকেইটা বনাঞ্চলতে কম-বেছি পৰিমাণে পৰ্যটকৰ আগমন ঘটিয়েই আছে।
মানাহলৈ অহা পৰ্যটকসকলে এইবাৰ ঢেঁকীয়াপতীয়া বাঘ, নাহৰফুটুকী বাঘ,ব্লেক পেন্থাৰ, হাতী, বাইচন,বনৰীয়া ম'হ, হৰিণা আদি বিভিন্ন জীৱ জন্তুৰ মুক্ত বিচৰণৰ নান্দনিক দৃশ্য মুক্তমনে উপভোগ কৰিবলৈ সক্ষম হৈছে। পূৰ্বৰ তুলনাত মানাহত জীৱ জন্তুৰ সংখ্যাও বৃদ্ধি পাইছে। বাঘৰ সংখ্যা পুনৰ বৃদ্ধি পাব বুলি আশা ব্যক্ত কৰে বনাঞ্চলিক বিষয়া বড়োৱে।
Continue Reading
