ডিজিটেল ডেস্কঃ হাৰিয়ানাত উদ্ধাৰ হৈছে ৪০০ বছৰ পুৰণি ভগৱান বিষ্ণুৰ মূৰ্তি। ৪০০ বছৰ ধৰি মাটুৰ তলত পোত গৈ থকা মূৰ্তি মাটি খননৰ সময়তে হঠাতে ওলায়। প্ৰত্নতাত্ত্বিকসকলে সেই মূৰ্তিৰ বয়স ৪০০ বছৰৰ ওপৰৰ হ’ব বুলি ধাৰণা কৰিছে। হাৰিয়ানাৰ চাইবাৰ চহৰ গুৰুগ্ৰামৰ ওচৰত উদ্ধাৰ হৈছে এই অতি প্ৰাচীন মূৰ্তি। মানেছাৰৰ বাঘনাকী গাঁৱত নিৰ্মাণ কাৰ্যৰ বাবে কৰি থকা ভূমি খননৰ সময়তে সুদৰ্শন চক্ৰধাৰী যোগ নিদ্ৰাত থকা ভগৱান বিষ্ণুৰ মূৰ্তি পোৱা গৈছে।
এতিয়ালৈকে মুঠ তিনিটা মূৰ্তি পোৱা গৈছে বুলি জানিব পৰা গৈছে। তিনিওটা মূৰ্তি এতিয়া চণ্ডীগড়ৰ পুৰাতাত্ত্বিক জৰীপ বিভাগক হস্তান্তৰ কৰা হৈছে। মূৰ্তিবোৰ পৰীক্ষা কৰাৰ পিছত সংশ্লিষ্ট বিভাগৰ বিষয়াসকলে কৈছে যে এই তিনিওটা মূৰ্তি প্ৰায় ৪০০ বছৰ পুৰণি।
প্ৰাপ্ত তথ্য অনুসৰি এজন লোকৰ মাটি জেচিবিৰে খন্দা হৈছিল। তেতিয়াই শ্ৰমিকসকলে তিনিটা মূৰ্তি দেখিছিল আৰু মাটিৰ মালিকক এই বিষয়ে অৱগত কৰিছিল। মালিকে এই মূৰ্তিবোৰ ৰাইজৰ দৃষ্টিৰ পৰা লুকুৱাই ৰাখিব বিচাৰিছিল। তেওঁ মূৰ্তি উদ্ধাৰৰ খবৰ কোনেও যাতে নাজানে সেয়া নিশ্চিত কৰিবলৈ জেচিবি চালকজনক টকাৰে প্ৰলোভিত কৰিব বিচাৰিছিল। অৱশ্যে জেচিবি চালকজনে দুদিন ধৰি টকা নোপোৱাৰ পিছত ঘটনাটো বিলাসপুৰ আৰক্ষী থানাক জনায়।
ঘটনাটোৰ বিষয়ে তথ্য লাভ কৰি আৰক্ষী ঘটনাস্থলীত উপস্থিত হয় আৰু মূৰ্তিবোৰ তেওঁলোকৰ জিম্মাত লৈ পুৰাতত্ব বিভাগক এই বিষয়ে অৱগত কৰে। পুৰাতত্ব বিভাগৰ উপ সঞ্চালক বনানী ভট্টাচাৰ্য আৰু ড. কুশে ধেৱৰ আৰক্ষী থানালৈ গৈ মূৰ্তি তিনিটা লৈ আহে। গাওঁবাসীয়ে কৈছে যে এই মূৰ্তিবোৰ তেওঁলোকৰ গাওঁৰ এক ঐতিহ্য আৰু তেওঁলোকে সেই ঠাইত এটা মন্দিৰ নিৰ্মাণ কৰিব বিচাৰে । পুৰাতত্ব বিভাগৰ উপ-সঞ্চালক বানানী ভট্টাচাৰ্যই কয় যে তিনিওটা মূৰ্তি ব্ৰঞ্জৰে নিৰ্মিত।
Continue Reading
