ডিজিটেল ডেস্কঃ সৰলতা মানুহৰ প্ৰধান অলংকাৰ। সহজ-সৰল, বিনয়ী মানুহে সহজতে মানুহৰ হৃদয়ত স্থান দখল কৰে। শেহতীয়াকৈ এখন ফটো ভাইৰেল হৈছে। সেই ফটো সুধা মূৰ্তিৰ। সুধা মূৰ্তি হৈছে 'Infosys'ৰ সংস্থাপক। বিশ্বখ্যাত নাৰায়ণ মূৰ্তি তেওঁৰ স্বামী। সুধা মূৰ্তিৰ জোঁৱাই ঋষি সুনক ইংলেণ্ডৰ প্ৰধানমন্ত্ৰী।
সুধা মূৰ্তি বহু প্ৰতিভাসম্পন্ন মহিলা আৰু বিশ্বৰ শক্তিশালী নাৰীসকলৰ ভিতৰত অন্যতম হিচাপে পৰিচিত। কিন্তু সুধা মূৰ্তি যিটোৰ বাবে আটাইতকৈ বেছি পৰিচিত সেয়া হ’ল তেওঁৰ নম্ৰতা আৰু বিনয়। বৰ্তমান ছ’চিয়েল মিডিয়াত ভাইৰেল হৈ পৰা ফটোখনত তেওঁক খালী ভৰিৰে মজিয়াত বহি সাধাৰণ মহিলাৰ দৰে কিবা ৰান্ধি থকা গেখা গৈছে। কেৰালাৰ তিৰুৱন্তপুৰৰ আট্টুকাল ভাগৱতী মন্দিৰত বহু মহিলাৰ মাজত মন্দিৰৰ চৌপাশতে মাটিত বহি 'পোংগালা' নামৰ এটা ধৰ্মীয় উৎসৱৰ বাবে প্ৰসাদ তৈয়াৰ কৰি আছিল সুধা মূৰ্তিয়ে।
সেই সময়ত আন মহিলাসকলে তেওঁক চিনিয়ে নাপালে। পাছত মালয়ালম অভিনেত্ৰী চিপ্পী ৰেঞ্জিথ আৰু কংগ্ৰেছৰ সাংসদ শশী থাৰুৰে তেওঁৰ সৈতে ছ’চিয়েল মিডিয়াত ফটো শ্বেয়াৰ কৰাৰ পাছত বিষয়টো ভাইৰেল হৈ পৰে।
সুধা মূৰ্তি প্ৰায় ৩ হাজাৰ কোটি টকা সম্পত্তিৰ গৰাকী। 'পদ্মশ্ৰী','পদ্মভূষণ' সন্মানেৰে জীৱন মহীয়ান হোৱা সুধা মূৰ্তি এগৰাকী শিক্ষাবিদ, লিখক, চিন্তাবিদো। এনে এগৰাকী মহিলাৰ এই সৰলতা আৰু বিনয়ে সকলোৰে হৃদয় জয় কৰিবলৈ সক্ষম হৈছে। আকাশ চুয়ো যাৰ ভৰি সদায় মাটিত থাকে তেনে মানুহৰ প্ৰতি মানুহৰ সদায় বিশেষ সন্মান থাকে।
Continue Reading
