ডিজিটেল ডেস্কঃ স্মৃতি ইৰাণী বৰ্তমান ৰাজনীতিত সক্ৰিয় কিন্তু এটা সময়ত তেওঁ এগৰাকী সুপৰিচিত টিভি অভিনেত্ৰী আছিল আৰু তেওঁ খ্যাতি লাভ কৰিছিল টিভি ধাৰাবাহিক 'কিউকি ছাচ ভি কভি বহু থি'ৰ পৰা, যিখন এতিয়াও আটাইতকৈ চৰ্চিত টিভি ধাৰাবাহিক। স্মৃতি এটা সময়ত মডেলিঙৰ ক্ষেত্ৰত বিখ্যাত আছিল যদিও এই টিভি ধাৰাবাহিকে তেওঁক ঘৰে ঘৰে বিখ্যাত কৰি তুলিছিল। শেহতীয়াকৈ দিয়া এক সাক্ষাৎকাৰত স্মৃতিয়ে সেই বিগত দিনবোৰৰ কথা মনত পেলাই এটা কথা সদৰী কৰিছিল।
স্মৃতিয়ে সেই দিনবোৰৰ কথা মনত পেলাইছিল যেতিয়া তেওঁ বিয়াৰ দিনাও কাম কৰিবলগীয়া হৈছিল আৰু আনকি মাক হোৱাৰ পিছত তৃতীয় দিনাও শ্বুটিঙলৈ ঘূৰি আহিবলগীয়া হৈছিল। স্মৃতিয়ে সাক্ষাৎকাৰত কয় যে তেওঁ মাতৃ হৈ তৃতীয় দিনাই শ্বুটিঙলৈ আহিছিল। ইয়াৰ আঁৰৰ কাৰণ আছিল স্মৃতিৰ দৰিদ্ৰতা। স্মৃতিৰ মতে, সেই সময়ত তেওঁ এদিনৰ দৰমহাও হেৰুৱাব বিচৰা নাছিল। দৰিদ্ৰতাক তেওঁ জীৱনত অতি নিবিড়ভাৱে দেখিছিল। এনে পৰিস্থিতিত তেওঁ টকা উপাৰ্জনৰ এটাও সুযোগ হেৰুৱাব বিছৰা নাছিল আৰু সেয়েহে মাতৃ হোৱাৰ পিছতো তেওঁ যিমান সোনকালে পাৰে কামলৈ উভতি আহিছিল।
কিছুদিনৰ আগতে স্মৃতি ইৰাণীয়ে আন এটা কথা প্ৰকাশ কৰিছিল স্মৃতিৰ গৰ্ভপাত হোৱাৰ সময়তো তেওঁক ফোনযোগে শ্বুটিঙৰ বাবে মাতিছিল আৰু সেই অৱস্থাতো তেওঁ আহি চেটত কাম কৰিবলগীয়া হৈছিল। তেওঁৰ সহ অভিনেতা অপৰা মেহতাইও এই সন্দৰ্ভত নিজৰ মতামত প্ৰকাশ কৰিছিল। তেওঁ কয় যে টিভি উদ্যোগৰ সকলোৰে লগত এনেকুৱা হৈছে। ইয়াত অভিনেতাসকলৰ পৰা অধিক নিষ্ঠাৰ দাবী কৰা হয় কাৰণ ইয়াত কাৰো বাবে খণ্ড ৰৈ নাযায় আৰু দৈনিক খণ্ডবোৰৰ বাবে অবিৰতভাৱে শ্বুটিং কৰিবলগীয়া হয়।
Continue Reading
