ডিজিটেল ডেস্কঃ সমগ্ৰ দেশতে আকাশলংঘী হৈছে বিলাহীৰ দাম। বিলাহীৰ দাম একাংশ অঞ্চলত প্ৰতি কেজিত ৩০০টকা হৈছেগৈ। ইয়াৰ প্ৰভাৱ জনসাধাৰণৰ পকেটৰ ওপৰত পৰিছে। একাংশ লোকে পাকঘৰত বিলাহী ব্যৱহাৰ কৰা বন্ধ কৰাৰ বিপৰীতে বহুতে এতিয়া বিকল্পৰ সন্ধানত নামিছে। বিলাহীৰ দাম বৃদ্ধিৰ মাজতে চৰ্চালৈ আহিছে এক কাহিনী। ডুবাইত বাস কৰা এগৰাকী কন্যাই মাকৰ বাবে ছুটকেছত টমেটো লৈ আহিল ১০ কেজি বিলাহী।
‘ৰেভছ’ নামৰ এটা টুইটাৰ হেণ্ডেলত টুইটাৰ ব্যৱহাৰকাৰীজনে লিখিছে, "মোৰ ভণ্টীয়ে ল'ৰা-ছোৱালীৰ সৈতে ডুবাইৰ পৰা ভাৰতলৈ আহিছিল গ্ৰীষ্মকালীন ছুটীৰ বাবে। তেওঁ মাকক সুধিছিল যে তেওঁ ডুবাইৰ পৰা কিবা আনিব লাগিব নেকি? মায়ে কৈছিল ১০ কেজি বিলাহী আনিব। আৰু ভণ্টীয়েও ১০ কেজি বিলাহী এটা ছুটকেছত পেক কৰিছিল।"
টুইটাৰ ব্যৱহাৰকাৰীজনে আৰু লিখিছে, "আমাৰ পৰিয়ালে বিলাহী বহুত ব্যৱহাৰ কৰে, গতিকে এতিয়া মই ডুবাইৰ পৰা অনা এই বিলাহীৰ পৰা আচাৰ, চাটনীৰ দৰে কিবা এটা বনাম। এই টুইটটো এতিয়া ভাইৰেল হৈ পৰিছে।
এতিয়া এই কাহিনীটো পঢ়াৰ পিছত টুইটাৰত বিভিন্নজনে বিভিন্ন ধৰণৰ প্ৰতিক্ৰিয়া প্ৰকাশ কৰিছে।
উল্লেখ্য যে বিলাহীৰ দাম বৃদ্ধিৰ মাজতে মহাৰাষ্ট্ৰৰ পুনেৰ এজন কৃষক এমাহৰ অলপ বেছি সময়ৰ ভিতৰতে সকলো প্ৰত্যাহ্বান অতিক্ৰম কৰি কোটিপতি হৈ পৰিছে।
এয়া পুনে জিলাৰ জুন্নাৰ তহচিলৰ পাচঘৰ গাঁৱৰ কৃষক ঈশ্বৰ গায়কৰ (৩৬)ৰ কাহিনী। মে’ মাহত বিলাহীৰ বীজৰ মূল্য তীব্ৰভাৱে হ্ৰাস পোৱাৰ বাবে কৃষকজনে বৃহৎ পৰিমাণৰ বিলাহী ধ্বংস কৰিবলগীয়া হৈছিল। কিন্তু এই বিফলতাৰ বাবে বিৰক্ত নোহোৱাকৈ তেওঁ ১২ একৰ মাটিত বিলাহীৰ খেতি কৰি থাকিল।
এতিয়া বিলাহীৰ আকাশলংঘী মূল্যৰ মাজতে কৃষক ঈশ্বৰ গাইকৰে কঠোৰ পৰিশ্ৰমৰ ফল লাভ কৰিছে, কিয়নো তেওঁ কোটিপতি হৈ পৰিছে। তেওঁ ১১ জুনৰ পৰা ১৮ জুলাইৰ ভিতৰত নিজৰ শস্যৰ উৎপাদিত সামগ্ৰী বিক্ৰীৰ জৰিয়তে ৩ কোটি টকা উপাৰ্জন কৰা বুলি দাবী কৰিছে।
Continue Reading
