ডিজিটেল ডেস্কঃ মণিপুৰৰ ঘটনাৰ বিষয়ে আলোচনা কৰাৰ আগতে, আমি নিজৰ ৰাজ্যৰ মহিলাসকলৰ দুৰ্দশাৰ বিষয়ে চিন্তা কৰা উচিত। নিজৰ দলৰ চৰকাৰৰ বিৰুদ্ধে এনে মন্তব্য কৰি মন্ত্ৰী পদ হেৰুৱালে এজনে। মন্ত্ৰীগৰাকীয়ে ৰাজ্যখনত মহিলাৰ সুৰক্ষাক লৈ নিজৰ চৰকাৰৰ ফালে আঙুলি টোৱাইছিল। কেইঘণ্টামানৰ পিছতে ৰাজস্থানৰ অশোক গেহলট চৰকাৰে তেওঁক মন্ত্ৰীপদৰ পৰা আঁতৰাই দিয়ে।
ৰাজস্থানৰ নিলম্বিত মন্ত্ৰীগৰাকী হৈছে ৰাজেন্দ্ৰ সিং গুধা । তেওঁ ৰাজস্থানৰ সেনা কল্যাণ (স্বতন্ত্ৰ দায়িত্ব), আৰু পঞ্চায়ত তথা গ্ৰামোন্নয়ন দপ্তৰৰ ৰাজ্যিক মন্ত্ৰী হিচাপে কাৰ্যনিৰ্বাহ কৰি আছিল।
ৰাজস্থান বিধানসভাত নিম্নতম উপাৰ্জন গেৰাণ্টি বিধেয়ক, ২০২৩ ৰ বিষয়ত বিতৰ্ক চলি আছিল। ইয়াৰ মাজতে মণিপুৰৰ ঘটনাটো আলোচনাৰ মাজলৈ আহিল। কংগ্ৰেছৰ বিধায়কসকলে মণিপুৰত দুগৰাকী মহিলাৰ ক্ষেত্ৰত ঘটা ঘটনাৰ বিৰুদ্ধে প্ৰতিবাদ কৰিছিল। ফলস্বৰূপে নিম্নতম উপাৰ্জন গেৰাণ্টি বিধেয়কৰ বিষয়ত আলোচনা স্থগিত ৰখা হৈছিল।
তাৰ পিছত ৰাজেন্দ্ৰ তেওঁৰ আসনৰ পৰা উঠিছিল আৰু মহিলাৰ সুৰক্ষাক লৈ নিজৰ চৰকাৰকে প্ৰশ্ন কৰিছিল। তেওঁ কৈছিল "আমি ৰাজস্থানত মহিলাসকলক সুৰক্ষা প্ৰদান কৰাত ব্যৰ্থ হৈছো। মহিলাৰ বিৰুদ্ধে হিংসা বৃদ্ধি পাইছে।
মণিপুৰৰ ঘটনাবোৰৰ বিষয়ে কোৱাতকৈ আমাক আত্মবিশ্লেষণৰ অধিক প্ৰয়োজন। ''
ইয়াৰ ঠিক পিছতে ৰাজস্থান বিধানসভাৰ বিৰোধী দলপতি আৰু বিজেপি বিধায়ক ৰাজেন্দ্ৰ সিং ৰাঠৌৰে মন্ত্ৰীগৰাকীৰ মন্তব্য ব্যৱহাৰ কৰি চৰকাৰক আক্ৰমণ কৰে।এনে ঘটনাৰ পিছতে ৰাজেন্দ্ৰ সিং গুধাৰ মন্ত্ৰী পদ কৰ্তন কৰা হয়।
Continue Reading
