ডিজিটেল ডেস্কঃ এয়াই প্ৰথম নহয়। ইয়াৰ পূৰ্বেও একাধিক বাৰ পৰাজয়েৰে বিশ্বকাপ আৰম্ভমি কৰিছিল আৰ্জেণ্টিনাই। ইয়াৰ মাজতে এবাৰ ফাইনেলো খেলিবলৈ সক্ষম হৈছিল লেটিন আমেৰিকান দেশখন।
কাটাৰ বিশ্বকাপৰ প্ৰথমখন মেচত দুৰ্বল চৌদী আৰৱৰ হাতত পৰাজীত হোৱাৰ পাছত এতিয়া সৰ্বত্ৰে চাঞ্চল্য বিৰাজ কৰিছে। ভাগি পৰিছে আৰ্জেণ্টিনাৰ অনুৰাগীসকল।
কিন্তু বিশ্বকাপৰ ইতিহাসত এনেকুৱা অলেখ ঘটনা-পৰিঘটনাৰ সাক্ষী হৈ ৰৈছে আৰ্জেণ্টিনা। ১৯৩০ চনত প্ৰথমখন বিশ্বকাপত ৰানাৰ্ছ আপ হৈছিল দলটো। ১৯৩৪ চনৰ বিশ্বকাপ আৰম্ভ কৰা হয় নক আউট পদ্ধতিৰে। সেইবাৰ প্ৰথম মেচতে চুইডেনৰ হাতত ২-৩ গ’লত পৰাজীত হৈছিল আৰ্জেণ্টিনা। ফলস্বৰূপে বিশ্বকাপৰ পৰা বিদায় ল’বলগা হৈছিল।
১৯৫৮ চনৰ বিশ্বকাপতো প্ৰথম মেচত হাৰে আৰ্জেণ্টিনা। পশ্চিম জাৰ্মানীয়ে ১-৩ গ’লত হৰুৱায় দলটোক। ১৯৭৪ চনৰ বিশ্বকাপত প্ৰথমখন মেচত পোলেণ্ডৰ হাতত ২-৩ গ’লত হাৰে আৰ্জেণ্টিনা। ১৯৮২ চনৰ বিশ্বকাপতো বেলজিয়ামৰ হাতত ০-১ ব্যৱধানত প্ৰথমখন মেচত পৰাস্ত হয় দলটো।
তাৰপাছত আহিল ১৯৮৬ চনৰ বিশ্বকাপ। ডিয়েগ’ মাৰাডোনাৰ পৰাক্ৰম আৰু আৰ্জেণ্টনাৰ বিশ্ববিজয়! ১৯৯০ চনৰ বিশ্বকাপতো বিশ্বজয়ৰ তীব্ৰ দাবীদাৰ আছিল আৰ্জেণ্টিনা। কিন্তু প্ৰথমখন মেচতে কেমেৰুণৰ হাতত ০-১ ব্যৱধানত পৰাস্ত হয়। প্ৰথম মেচত হাৰিও দলটো ফাইনেলত প্ৰৱেশ কৰিছিল। ফাইনেলত পশ্চিম জাৰ্মানীৰ হাতত পৰাজীত হয় মাৰাডোনাবাহিনী।
২০১৮ চনতো বিশ্বকাপৰ প্ৰথমখন মেচত কথমপি পৰাজয়ৰ পৰা বাচি যাবলৈ সক্ষম হয় আৰ্জেণ্টিনা। আইচলেণ্ডৰ স’তে হোৱা মেচখন ড্ৰ হয়। বিশ্বকাপৰ ইতিহাসত এইদৰে অলেখ অভিজ্ঞতাৰ সন্মুখীন হোৱা মেছিবাহিনী পুনৰ উজ্বলি উঠিবনে? উদ্ধুদ্ধ হ’বনে মাৰাডোনাৰ উৎসাহেৰে?
Continue Reading
