ডিজিটেল ডেস্কঃ সদ্যসমাপ্ত কাটাৰ বিশ্বকাপত আৰ্জেণ্টিনাই পিন্ধিলে বিজয়ৰ মুকুট। এই জয়েৰে ৩৬ বছৰৰ সুদীৰ্ঘ সময়ৰ ব্যৰ্থতাৰ অৱসান ঘটালে আৰ্জেণ্টিনাই। প্ৰথমবাৰৰ বাবে বিশ্ব জয়ৰ সোৱাদ ল’লে ফুটবলৰ মহাতাৰকা লিঅ’নেল মেছিয়ে। মেছিৰ ফুটবল মেজিকত মন্ত্ৰমুগ্ধ সমগ্ৰ বিশ্ব। মেছিক মানুহে বহুত ভালপায়। লিঅ’নেল মেছিৰ এই সাফল্যত আনন্দত আত্মহাৰা হৈ আৰ্জেণ্টিনাৰ এগৰাকী যুৱকে কৰিলে এক ডাঙৰ কাম। যুৱকজনৰ নাম মাইক জেম্বছ।
মাইক জেম্বছে মেছিৰ প্ৰতি থকা প্ৰেম প্ৰদৰ্শন কৰিবলৈ কপালত বনাই ল'লে মেছিৰ নামৰ টাটু। তেওঁৰ কপালত ডাঙৰকৈ জিলিকি উঠিল MESSI. কিন্তু এতিয়া যুৱকজনে নিজৰ এই সিদ্ধান্তক লৈ অনুশোচনাত ভুগিছে। তেওঁ ভুগিছে হতাশাত। মাইকে অনুভৱ কৰিছে তেওঁ যেন এক ডাঙৰ ভুল কৰি পেলালে।
কিন্তু হঠাতে কিয় এই অনুশোচনা মাইক জেম্বছৰ? মেছিৰ প্ৰতি মোহভংগ ঘটিল নেকি মাইক জেম্বছৰ? নে কপালত এনেদৰে টাটু বনাই নিজকে তেওঁ অসুন্দৰ দেখিছে? পাছে এনেকুৱা একো হোৱা নাই। যুৱকজনৰ অনুশোচনাৰ কাৰণ বেলেগ। নিজৰ ইনষ্টাগ্ৰাম একাউণ্টত মাইকে এই কথা জনাইছে।
এটা ভিডিঅ’ পোষ্ট কৰি মাইক জেম্বছে কেপচনত লিখিছে, “মেছিৰ নাম টাটু কৰি মোৰ আক্ষেপ হৈছে।” ভিডিঅ’টোত তেওঁ কয় যে “কপালত টাটু কৰাৰ সিদ্ধান্ত একেবাৰেই সঠিক নাছিল। এতিয়া মোৰ অনুশোচনা হৈছে। মই ভাবিছিলো সকলোৱে মোৰ শলাগ ল’ব। কিন্তু ইয়াৰ বিপৰীতহে ঘটিল। সকলোৱে মোৰ লগত বৰ অপমানজনক ব্যৱহাৰ কৰিছে।”
মাইকে জানিবলৈ দিয়া মতে টাটুটো কৰাৰ পিছত তেওঁক ব্যক্তিগতভাৱে আক্ৰমণ কৰা হৈছে। তেওঁৰ পৰিয়ালৰ লোককো মানুহে ঠাট্টা-মস্কৰা কৰিছে। মাইকে কপালত টাটু বনাই ছ’চিয়েল মিডিয়াত কেইবাখনো ছবি পোষ্ট কৰিছিল। এই ফটোসমূহ দেখি একাংশ লোকে মাইকক ট্ৰল কৰিবলৈ আৰম্ভ কৰে। বহুতে মন্তব্য কৰে যে তেওঁ কেৱল সস্তীয়া জনপ্ৰিয়তাৰ বাবে এই কাম কৰিছিল।
এইদৰে ট্ৰলৰ সন্মুখীন হৈ হতাশাত ভুগিছে মাইক জেম্বছ। দুখ প্ৰকাশ কৰি মাইকে কয় যে “মোক কিয় ইমান বেয়া ব্যৱহাৰ কৰিছে সেয়া মই বুজিব পৰা নাই। এই টাটুটোক লৈ মই গৰ্ব কৰিছিলো কিন্তু এতিয়া মোৰ ভুল হোৱা যেন লাগিছে।”
Continue Reading
