ডিজিটেল ডেস্কঃ এক দুঃখবৰ। মহাভাৰতৰ শকুনি মামা আৰু নাই। বি আৰ চোপ্ৰাৰ বিখ্যাত ঐতিহাসিক টিভি অনুষ্ঠান ‘মহাভাৰত’এ দৰ্শকৰ যথেষ্ট মৰম লাভ কৰিবলৈ সক্ষম হৈছিল। এই শ্ব’টোৰ প্ৰতিটো চৰিত্ৰই অনুৰাগীৰ হৃদয়ত অতি গুৰুত্বপূৰ্ণ স্থান লাভ কৰিছিল। সেই মহাভাৰততে শকুনি মামাৰ চৰিত্ৰত অভিনয় কৰি ঘৰে ঘৰে জনপ্ৰিয় হৈ উঠিছিল অভিনেতা গুফী পেইন্টাল।
তেওঁৰ প্ৰকৃত নাম কোনেও জনা নাছিল। শকুনি মামা বুলিয়েই সকলোৱে চিনি পাইছিল। মহাভাৰতক জনপ্ৰিয় কৰি তোলাত গুফী পেইন্টালৰো অৱদান যথেষ্ট। তেওঁৰ অভিনয় ইমানেই জীৱন্ত আছিল যে শকুনি মামা বুলি কলেই মানুহৰ মনলৈ গুফী পেইন্টালৰ চেহেৰাটো আপোনা-আপুনি ভাঁহি উঠে।
সেই গুফী পেইন্টালেই আজি সকলোকে শোক সাগৰত পেলাই অনন্ত ধামলৈ গতি কৰিলে। দীৰ্ঘদিন ধৰি চিকিৎসালয়ত ভৰ্তি হৈ আছিল অভিনেতাগৰাকী। মৃত্যুৰ সময়ত তেওঁৰ বয়স হৈছিল ৭৮ বছৰ।
গুফী পেইণ্টালৰ ভতিজা হিটেনে কয় যে বয়সৰ লগত জড়িত কেইবাটাও ৰোগত আক্ৰান্ত গুফী পেইণ্টলৰ হৃদযন্ত্ৰৰ ক্ৰিয়া বন্ধ হৈ মৃত্যু ঘটিছে। এতিয়া এই খবৰটো ছ’চিয়েল মিডিয়াত ক্ৰমান্বয়ে ভাইৰেল হৈ পৰিছে আৰু অনুৰাগীকে ধৰি চিনেমাৰ বহু তাৰকাই অভিনেতাগৰাকীক শ্ৰদ্ধাঞ্জলি জনাইছে।
গুফী পেইন্টালৰ শেষকৃত্য বিয়লি ৪ বজাত সম্পন্ন কৰা হ'ব। আশা কৰা হৈছে যে চিনেমা জগতৰ বহু প্ৰবীণ আৰু ডাঙৰ তাৰকাই তেওঁৰ এই শেষযাত্ৰাত যোগ দিব।
উল্লেখ্য যে অভিনেতাগৰাকীয়ে আশীৰ দশকত হিন্দী ছবিৰ বাহিৰেও কেইখনমান টিভি ধাৰাবাহিকত অভিনয় কৰিছিল। অভিনয়ৰ জগতখনত ভৰি দিয়াৰ আগতে তেওঁ এজন অভিযন্তা আছিল।
Continue Reading
