'মই জানো তুমি ইয়াতেই আছা'- সিদ্ধাৰ্থৰ স্মৃতি সুঁৱৰি বিগ বছলৈ পুনৰ শ্বেহনাজ

ডিজিটেল ডেস্ক : হেৰুৱা অতীতৰ সুঁহুৰিয়ে আজিও উদ্বিগ্ন কৰি তোলে শ্বেহনাজক। হেৰুৱা মাণিক বিচাৰি আহিব শ্বেহনাজে। 'মই জানো তুমি ইয়াতেই আছা সিদ্ধাৰ্থ৷ তোমাক বিচাৰি মই আহি আছো'- বিগ বছ-১৫ত পুনৰ ৱাইল্ডকাৰ্ড যোগে আগমন ঘটিব শ্বেহনাজ গিলৰ৷ অকালতে প্ৰাণ হেৰুওৱা প্ৰেমিক সিদ্ধাৰ্থক বিচাৰি আকৌ বিগ-বছৰ পদূলিত খোজ থ’ব শ্বেহনাজে ৷ 'ছিদনাজ'- এটি প্ৰেমিক যুগল৷ প্ৰেমৰ মোহাচ্ছনতাই আৱৰি ৰখা এহাল প্ৰেমিল চৰাই৷ অতি কম সময়ৰ ভিতৰত অনুৰাগীৰ হৃদয় জিনিছিল এই যুগলবন্দীয়ে৷ বিগ বছ-১৩ৰ প্ৰেমিকযুগল শ্বেহনাজ গিল আৰু সিদ্ধাৰ্থ শুক্লা৷ ৰূপালী পৰ্দাত দুয়োৰে আকুল প্ৰেমে সকলোকে আপ্লুত কৰিছিল৷ দুয়োৰে মাজত গঢ় লোৱা সম্পৰ্কই বিগ বছ-১৩ত সকলোকে দিছিল আমোদ, কৰিছিল ৰোমাঞ্চিত৷ অফুৰন্ত ভালপোৱাৰ কথা শ্বেহনাজে ব্যক্ত কৰিছিল প্ৰেমিক সিদ্ধাৰ্থক৷ সকলোবোৰ যেন থিকেই আছিল৷ কিন্তু নিয়তিৰ কি নিষ্ঠুৰ পৰিহাস! অকালতে ছন্দ হেৰুৱালে শ্বেহনাজে। জীৱনৰ বাটত শ্বেহনাজ হৈ পৰিল নিসংগ! হৃদ ৰোগত আক্ৰান্ত হৈ আকস্মিকভাৱে আঁতৰি গ’ল সিদ্ধাৰ্থ, এখন নেদেখা নদীৰ সিপাৰে৷ সময়ৰ সোঁতত সকলো সলনি হ'ল৷ কিন্তু সলনি নহ'ল শ্বেহনাজৰ অন্তহীন প্ৰেম-ভালপোৱাৰ অবিচলিত ছন্দ৷ সেয়ে সিদ্ধাৰ্থক বিচাৰি শ্বেহনাজ আকৌ উভতি আহিব বিগ বছলৈ৷

শেহতীয়াকৈ কালাৰ্ছ টেলিভিছনৰ পৰ্দাত আৰম্ভ হৈছে বিগ বছ-১৫ৰ নৱতম সংস্কৰণ৷ ইতিমধ্যে এই অনুষ্ঠানটোৱে আমোদ দিবলৈ সক্ষম হৈছে দৰ্শকক৷ আৰু তেনে সময়তে শ্বেহনাজ গিলৰ বিগ বছ হাউছত আগমনৰ পুনৰ এক সম্ভাৱনা ইংগিত বহন কৰিছে৷ ইতিমধ্যেই শ্বেহনাজে 'বিগ বছ ১৩'ৰ যোগেদি দৰ্শকক হৃদয় জিনিবলৈ সক্ষম হৈছিল৷ আৰু তেনেদৰে শ্বেহনাজৰ অনুৰাগীও আগতকৈ বহু বৃদ্ধি পাইছিল৷ সিদ্ধাৰ্থ আৰু শ্বেহনাজৰ কেমেষ্ট্ৰিয়ে বিগ বছ-১৩ ত বহু আলোড়নৰ সৃষ্টি কৰিছিল৷ কিন্তু দুখৰ বিষয় যে, এই বছৰৰ আৰম্ভণিতে ২ ছেপ্টেম্বৰত সিদ্ধাৰ্থৰ আকস্মিক মৃত্যুৰ পাছত শুক্লাৰ অনুৰাগীসকলো শোকত ম্ৰিয়মান হৈ পৰিছিল। প্ৰেমিকা শ্বেহনাজো ভাগি পৰিছিল ৷

ছিদনাজৰ কাহিনীৰ সম্পৰ্কও ইয়াতেই সমাপ্ত হৈছিল। অতীত হৈছিল দুয়োৰে প্ৰেমগাথা৷ কিন্তু হেৰাই যোৱা নাছিল দুয়োৰে এই মধূৰ স্মৃতি। হেৰাই যোৱা নাছিল সিদ্ধাৰ্থৰ প্ৰতি থকা ভালপোৱা৷ বহু দিনৰ অপেক্ষাৰ পাছত অনুৰাগীসকলৰ মুখত হাহি বিৰিঙালে প্ৰেমিকা শ্বেহনাজে৷ বিগ বছ-১৫ত আকৌ আহিব শ্বেহনাজ গিল৷ এই খবৰটোৱে যেন উৎফুল্লিত কৰিলে অনুৰাগীক৷ এতিয়াৰ অনুৰাগীসকলৰ এটাই অপেক্ষা বিগ বছৰ ঘৰত প্ৰৱেশ কেতিয়া কৰিব শ্বেহনাজে? শ্বেহনাজৰ আগমনত ছিদনাজ অনুৰাগীসকলৰ বাবে এক আৱেগিক মুহূৰ্ত হ'বলৈ গৈ আছে বিগ বছৰ বাকৰি৷