মই ভাগৰা নাই, জীৱন হেৰোৱা নাই... সঁচাকৈয়ে জুবিন ভাগৰা নাইনে? জুবিনক কিছুদিন জিৰণিৰ প্ৰয়োজন নেকি?

মানুহ উবুৰি খাই পৰিল জুবিনৰ বাবে। জুবিন মানেই  এক সুৰীয়া কণ্ঠ। এই কণ্ঠ ভগৱান প্ৰদত্ত। এই কণ্ঠক সজীৱ কৰি ৰখাটো জুবিনৰ প্ৰথম কৰ্তব্য হোৱা উচিৎ। কিন্তু ইয়াৰ বিপৰীতে দেখা গৈছে যে বিহুৰ বতৰত জুবিনে যেন বাধ্যত পৰিহে সংগীতানুষ্ঠানসমূহলৈ গৈছে। সেয়ে মিউজিক চিষ্টেমৰ জুবিনৰ কণ্ঠ আৰু সংগীতানুষ্ঠানৰ জুবিনৰ কণ্ঠৰ মাজত আকাশ-পাতল পাৰ্থক্য মানুহৰ চকুত ধৰা পৰিছে। পহিলা বহাগৰ দিনাই জুবিনে কি কৰিলে! আজাৰাৰ বিহুতলীত গীত গাবলৈ গৈ জুবিনে নিজৰ গীতেই পাহৰিলে। ৰুণ জুণ নুপূৰে মাতে... নাই নিজৰেই গান গাব নোৱাৰিলে জুবিনে। বহুতে কোৱা অনুসৰি জুবিনৰ হয়তো গা বেয়া , সেই বাবেই গান গাব পৰা নাই। হয়তো সেয়াও হ’ব পাৰে। জুবিন সঁচাকৈয়ে ভাগৰুৱা নেকি? জুবিনে কমেও ছমাহ জিৰণি লোৱা উচিৎ নেকি? এনেবোৰ প্ৰশ্নই এতিয়া বহুতৰে মনত দোলা দিছে। জুবিন গাৰ্গ কেৱল অসমৰে নহয় , সমগ্ৰ ভাৰতৰে সাংস্কৃতিক জগতৰ এটা পৰিচিত নাম।

 অসমৰ সমানেই পশ্চিম বংগতো জুবিনৰ গান বুলিলেই জনপ্ৰিয় গান। চোখেৰ জলে ভাছিয়ে দিলামকে ধৰি  বহু গান বংগত অতি জনপ্ৰিয়। অসমীয়া জনসাধাৰণৰো সিৰাই সিৰাই  সোমাই  আছে জুবিনৰ গান। সেয়ে কণ্ঠই জুবিনৰ প্ৰথম পৰিচয়। কণ্ঠই মানুহৰ মাজত সজীব কৰি ৰাখিব জুবিনক। সেই কণ্ঠক জীপাল কৰি ৰখাৰ বাবেই জুবিনে কিছুদিন জিৰণি লোৱা প্ৰয়োজন বুলি বহুতে মন্তব্য কৰিছে। এয়া সত্য কথা যে  ভূপেন হাজৰিকাই কিন্ত তেওঁ ৮০ বছৰৰ ওপৰলৈকে গান গাইছিল। জুবিনে সৃষ্টি কৰাৰ দৰে পৰিবেশ ভূপেন হাজৰিকাই কোনো অনুষ্ঠানতে কৰা নাছিল। সুধাকণ্ঠৰ তুলনাত জুবিনৰ বয়সনো কিমান? কিন্তু জুবিনৰ কণ্ঠৰ মাদকতা এতিয়াই বহু ম্লান পৰিছে, এতিয়া জুবিনে নিজৰেই গান পাহৰা হৈছে! এয়া নিশ্চয়কৈ অসমবাসীৰ বাবে এক চিন্তনীয় বিষয়। জুবিন এক বিশাল প্ৰতিভা। এই প্ৰতিভাক সজীৱ কৰি ৰাখিবলৈ সেয়ে জুবিনে কিছুদিনৰ বাবে হ’লেও জিৰণি লোৱা প্ৰয়োজন। কিছুদিনৰ জিৰণিয়ে জুবিনক পুনৰ আগৰ জুবিন কৰি তুলিব পাৰিব নিশ্চয়। মঞ্চত আকৌ জুবিনে আউল নলগাকৈ গাব পাৰিব  মই ভাগৰা নাই, জীৱন হেৰোৱা নাই... আপুনি কি কয়?