ডিজিটেল ডেস্কঃ ইতিমধ্যে চন্দ্ৰযান-৩ৰ উৎক্ষেপণৰ কাউণ্টডাউন আৰম্ভ হৈছে। শুকুৰবাৰে (১৪ জুলাই) দিনৰ ২:৩৫ বজাত অন্ধ্ৰ প্ৰদেশৰ শ্ৰীহৰিকোটাৰ পৰা এই অভিযান আৰম্ভ কৰাৰ পৰিকল্পনা কৰা হৈছে। ইছৰোৱে বৃহস্পতিবাৰে (১৩ জুলাই) কয় যে ভাৰতৰ তৃতীয় চন্দ্ৰ অভিযান চন্দ্ৰযান-৩ উৎক্ষেপণৰ কাউণ্টডাউন আৰম্ভ হৈছে।
চন্দ্ৰযান-৩ অভিযানৰ উৎক্ষেপণ প্ৰক্ৰিয়াৰ ২৪ ঘণ্টীয়া উৎক্ষেপণৰ আখৰা বুধবাৰে সম্পূৰ্ণ হয়। জ্যেষ্ঠ মহাকাশ বিজ্ঞানী জি মাধৱন নায়াৰে কয় যে চন্দ্ৰত উপনীত হ’বলৈ চন্দ্ৰযান-৩ অভিযান সকলো দিশতে সফল হ’ব লাগে যাতে ভাৰতে মহাকাশ অনুসন্ধানৰ ক্ষেত্ৰত এক গুৰুত্বপূৰ্ণ মাইলৰ খুঁটি অতিক্ৰম কৰিব পাৰে। তেওঁ চন্দ্ৰপৃষ্ঠত মষৃণ অৱতৰণক অত্যন্ত কঠিন আৰু প্ৰত্যাহ্বানমূলক বুলি অভিহিত কৰে।
চাৰি বছৰ পূৰ্বে ২০১৯ চনত চন্দ্ৰযান-২ অভিযানৰ সময়ত লেণ্ডাৰৰ অৱতৰণত সফলতা পোৱা নাছিল। ইয়াৰ পৰিপ্ৰেক্ষিতত চন্দ্ৰযান-৩ অভিযান ভাৰতৰ বাবে অতি গুৰুত্বপূৰ্ণ বুলি বিবেচিত হৈছে। মাধৱন নায়াৰে কয় যে ৰাষ্ট্ৰীয় মহাকাশ সংস্থাটোৱে প্ৰায় চাৰি বছৰ পূৰ্বে চন্দ্ৰযান-২ৰ অৱতৰণৰ সময়ত সন্মুখীন হোৱা সমস্যা সমাধানৰ বাবে কেইবাটাও ব্যৱস্থা গ্ৰহণ কৰি নতুন সমূহ ব্যৱস্থা শক্তিশালী কৰি তুলিছিল।
এই অভিযান লঞ্চ ভেহিকেল মাৰ্ক-৩ (এলভিএম৩)ৰ পৰা আৰম্ভ কৰা হ’ব। যাক ইছৰোৰ বিজ্ঞানীৰ দ্বাৰা ফেট বয় বুলিও কোৱা হয়।ই বৰ্তমানলৈকে একেৰাহে ছটা সফল অভিযান সম্পূৰ্ণ কৰিছে। চন্দ্ৰযান-৩ৰ চন্দ্ৰপৃষ্ঠত অৱতৰণ আগষ্ট মাহৰ শেষৰ ফালে হোৱাৰ কথা। এই সন্দৰ্ভত বিজ্ঞানী নায়াৰে কয় যে এইটো এটা অতি কঠিন তথা জটিল প্ৰক্ৰিয়া আৰু আমি প্ৰথমবাৰৰ বাবে অজ্ঞাত এলেকাত অৱতৰণ কৰিবলৈ ওলাইছো। আমি ধৈৰ্য্যৰে সময়লৈ চোৱা উচিত।
Continue Reading
