ডিজিটেল ডেস্কঃ ৰাজনৈতিক অস্থিৰতাই বিৰাজ কৰা পাকিস্তানত এতিয়া বয়-বস্তুৰ দাম ইমানেই বেছি বৃদ্ধি পাইছে যে সাধাৰণ জনতাই ত্ৰাহি মধুসূদন সোঁৱৰিবলগীয়া অৱস্থাৰ সৃষ্টি হৈছে৷ প্ৰায় প্ৰতিবিধ অত্যাৱশ্যকীয় সামগ্ৰীৰেই দাম এতিয়া দেশ খনত আকাশলংঘী হৈ পৰিছে৷
শেহতীয়া খবৰ অনুসৰি দেশ খনত গাখীৰৰ দাম প্ৰতি লিটাৰত ২১০ পাকিস্তানী টকা হৈছে৷ একেদৰে ব্ৰইলাৰ কুকুৰাৰ মূল্য প্ৰতি কিলোগ্ৰামত ৫০০ পাকিস্তানী টকালৈ বৃদ্ধি পাইছে।স্থানীয় কুকুৰাৰ মাংসৰ দাম প্ৰতি কিলোগ্ৰামত ৭৮০ টকাৰ হৈছে৷ হাড়বিহীন মাংসৰ দাম প্ৰতি কিলোগ্ৰামত ১১০০ টকালৈ হৈছে৷
২০২২ চনত হোৱা বানৰ পিছৰে পৰা পাকিস্তানৰ কঁকাল ভাগি পৰিছে৷ সেই বানত ১৭৩৯ জন লোকৰ মৃত্যু হোৱাৰ লগতে ২০ লাখ বাসভৱন জাহ গৈছিল।
দেশখনত মজুত থকা বিদেশী মুদ্ৰাৰ ভাণ্ডাৰত এতিয়া মাত্ৰ ১০ বিলিয়ন ডলাৰ হৈছে বুলি বিভিন্ন সূত্ৰই প্ৰকাশ কৰিছে৷
ইপিনে পাকিস্তানৰ মূৰৰ ওপৰত আছে বেশৰ বিভিন্ন প্ৰতিষ্ঠানৰ পৰা লোৱা ধাৰৰ বোজা৷ দেশ খনে সেয়ে বাৰে বাৰে বেইলআউট বিচাৰি হাবাথুৰি খাবলগীয়া হৈছে৷
দেশ খনত বিগত কিছু বছৰ ধৰি শক্তি আৰু ইন্ধনৰো ব্যাপক নাটনিয়ে দেখা দি আহিছে৷ বিদ্যুতৰ নাটনিৰ জোৰা মাৰিবলৈ পাকিস্তানৰ চৰকাৰে আজিকালি নিশা ১০ বজাৰ ভিতৰতে বিবাহ ভৱন আদি বন্ধ কৰাৰ নিৰ্দেশ দিছে৷ একেদৰে শ্বপিং মলসমূহো নিশা ৮-৩০ বজাতে বন্ধ কৰা হয়৷
Continue Reading
