ডিজিটেল ডেস্কঃ ভাৰতৰ এখন অত্যাধুনিক যুদ্ধ বিমান মিগ ২৯ৰ আধুনিকীকৰণৰ কাম কেইবা বছৰ আগতে আৰম্ভ হৈছিল। এতিয়া সেয়া সম্পূৰ্ণ হৈ উঠিছে আৰু ইয়াৰ পিছতে ভাৰতীয় বায়ু সেনাই কাশ্মীৰ-লাডাখ সীমান্তত মিগ-২৯ যুঁজাৰু বিমান মোতায়েন কৰা আৰম্ভ কৰিছে।
চীন আৰু পাকিস্তানৰ সম্ভাৱ্য আক্ৰমণ প্ৰতিহত কৰিবলৈ শ্ৰীনগৰ এয়াৰবেছত নতুন মিগ-২৯ ৰ এটা স্কোয়াড্ৰন মোতায়েন কৰা হৈছে।উন্নত মিগ-২৯ বিমান শ্ৰীনগৰত নিয়োজিত ট্ৰাইডেণ্টছ স্কোয়াড্ৰনক হস্তান্তৰ কৰা হৈছে বুলি আইএএফৰ সূত্ৰই প্ৰকাশ কৰিছে। এতিয়ালৈকে, 'উত্তৰৰ ৰক্ষক' বুলি জনাজাত স্কোয়াড্ৰনে ১৯৬০ ৰ দশকত নিৰ্মিত ৰাছিয়াৰ যুঁজাৰু বিমান মিগ-২১ ব্যৱহাৰ কৰি আহিছিল।
ভাৰতীয় বায়ু সেনাৰ পাইলট স্কোয়াড্ৰন লিডাৰ বিপুল শৰ্মাই সংবাদ সংস্থাক জনোৱা মতে কৌশলগত অৱস্থানৰ বাবে শ্ৰীনগৰ বায়ু সেনা ঘাটিৰ পৰা দুয়োটা সীমা নিৰীক্ষণ কৰা সম্ভৱ। "আধুনিক মিগ-২৯ৰ সহায়ত আমি দুয়োটা দিশতে শত্ৰুৰ মুখামুখি হ'বলৈ সক্ষম হ'ম। ''প্ৰতিৰক্ষা মন্ত্ৰালয়ৰ সূত্ৰ অনুসৰি আধুনিকীকৰণৰ পিছত, মিগ-২৯ যুঁজাৰু বিমানবোৰ এতিয়া আগতকৈ অধিক বিপদমুক্ত হৈ পৰিছে।
ৰাছিয়াত নিৰ্মিত যুঁজাৰু বিমানখনত মৈাজআকাশতে ইন্ধন ভৰাব পৰা যায়৷ মিগ-২৯ এতিয়া অত্যাধুনিক মিছাইল কঢ়িয়াই নিবলৈ সক্ষম হৈ উঠিছে আৰু একে সময়তে বিভিন্ন দিশত আক্ৰমণো কৰিবলৈ সক্ষম। বায়ু সেনাৰ এই বিমান খনৰ আধুনিকীকৰণ সম্পূৰ্ণ হোৱাৰ লগে লগে ভাৰতৰ আকাশ এতিয়া আগতকৈ অধিক সুৰক্ষিত হৈ পৰিছে। নতুন মিগ-২৯ যুঁজাৰু বিমানৰ প্ৰথম ঠিকনা আছিল জলন্ধৰৰ আদমপুৰ বায়ু সেনা ঘাটিত। এইবাৰ এই বিমান শ্ৰীনগৰলৈও আহিল৷
Continue Reading
