মিত্ৰদলকো এৰিবলৈ সাজু শিৱসেনা! সঞ্জয় ৰাউটৰ মন্তব্যই প্ৰমাণ কৰিছে থাকৰে শিবিৰৰ অসহায় অৱস্থা

ডিজিটেল ডেস্ক : শিৱসেনাৰ নেতা একনাথ চিন্দেৰ নেতৃত্বত হোৱা বিসম্বাদে এতিয়া সকলো পথ ৰুদ্ধ কৰিছে শিৱসেনাৰ। তেওঁলোকে চৰকাৰ ৰক্ষা কৰাৰ কোনো পথ বিচাৰি পোৱা নাই। ইতিমধ্যেই মু্খ্যমন্ত্ৰী উদ্ধৱ থাকৰেই চৰকাৰী বাসভৱন এৰি মাতোশ্ৰীলৈ উভতি গৈছে। কিন্তু এতিয়াও যেন দলক ভাঙোনৰ পৰা বছোৱাৰ চেষ্টা কৰিছে সাংসদ তথা শিৱসেনাৰ মুখপাত্ৰ সঞ্জয় ৰাউটে।

চৰকাৰখন পতনৰ গৰাহত পৰাৰ মাজতে দলৰ সাংসদ সঞ্জয় ৰাউতে কয় যে, যদি অসমত শিবিৰ পাতি থকা বিদ্ৰোহী বিধায়কৰ দলটো ২৪ ঘণ্টাৰ ভিতৰত মুম্বাইলৈ উভতি আহে আৰু মুখ্যমন্ত্ৰী উদ্ধৱ থাকৰেৰ সৈতে বিষয়টো আলোচনা কৰে, তেন্তে শিৱসেনাই মহাৰাষ্ট্ৰৰ মহা বিকাশ আঘাদী (এমভিএ) চৰকাৰ এৰিবলৈ সাজু আছে। এই মন্তব্যৰ পাছতে এইবাৰ আন সহযোগ দল দুটা অসন্তুষ্ট হৈ পৰাৰ উপক্ৰম ঘটিছে। মহাৰাষ্ট্ৰ কংগ্ৰেছৰ মুৰব্বী নানা পাটোলেই ৰাউটৰ মন্তব্যৰ প্ৰতিক্ৰিয়া প্ৰকাশ কৰি কয়, বিজেপিক ক্ষমতালৈ অহাৰ পৰা বাধা দিবলৈ আমি তেওঁলোকৰ (শিৱসেনা) সৈতে আছো। কংগ্ৰেছ মজিয়া পৰীক্ষাৰ বাবে সাজু। আমি এমভিএৰ সৈতে আছোঁ আৰু থাকিম। যদি শিৱসেনাই আন কাৰো সৈতে মিত্ৰতা কৰিব বিচাৰে, আমাৰ কোনো সমস্যা নাই।

একনাথ চিন্দে বৰ্তমান ৩৭জন বিদ্ৰোহী শিৱসেনা বিধায়ক আৰু নজন নিৰ্দলীয় বিধায়কপ সৈতে গুৱাহাটীত শিবিৰ পাতি আছে, যাৰ ফলত মহাৰাষ্ট্ৰ চৰকাৰৰ পতন নিশ্চিত হৈ পৰিছে। ইয়াৰ সুযোগ ল’বলৈ বিজেপি ততপৰ হৈ পৰিছে। এনে পৰিস্থিতিত উপায়বিহীন হৈ মিত্ৰদলকে এৰিবলৈ সাজু হৈছে শিৱসেনা। উল্লেখ্য যে, নেচনেলিষ্ট কংগ্ৰেছ পাৰ্টি (এনচিপি) আৰু কংগ্ৰেছো এমভিএ চৰকাৰৰ অংশীদাৰ। পিছে সঞ্জয় ৰাউটৰ মন্তব্যই অন্য এক সংকটৰহে সৃষ্টি কৰিব পাৰে।

সঞ্জয় ৰাউতে সাংবাদিকক কয়, "চিন্দেই কৈছে যে আপুনি এজন প্ৰকৃত শিৱসৈনিক আৰু তেওঁ দল এৰি নাযায়। আমি তেওঁৰ দাবী বিবেচনা কৰিবলৈ সাজু, যদিহে তেওঁ ২৪ ঘণ্টাৰ ভিতৰত মুম্বাইলৈ ঘূৰি আহে আৰু মুখ্যমন্ত্ৰী উদ্ধৱ থাকৰেৰ সৈতে বিষয়টো আলোচনা কৰে। তেওঁলোকৰ দাবী ইতিবাচকভাৱে বিবেচনা কৰা হ'ব।"