প্ৰধানমন্ত্ৰীৰে মিলিত হ’ল দেশৰ সম্ভাব্য ৰাষ্ট্ৰপতি দ্ৰৌপদী মুৰ্মু, কি ক’লে মোদীয়ে?

ডিজিটেল ডেস্ক : এন ডি এৰ ৰাষ্ট্ৰপতি পদৰ প্ৰাৰ্থী দ্ৰৌপদী মুৰ্মুৱে বৃহস্পতিবাৰে প্ৰধানমন্ত্ৰী নৰেন্দ্ৰ মোদীক সাক্ষাৎ কৰে। মঙলবাৰে এন ডি এই ৰাষ্ট্ৰপতি পদৰ প্ৰাৰ্থী হিচাপে নিৰ্বাচিত কৰাৰ পাছত প্ৰথমবাৰলৈ দিল্লীলৈ আহিছে দ্ৰৌপদী মুৰ্মু। ৰাষ্ট্ৰপতি নিৰ্বাচনত তেওঁৰ বিজয় প্ৰায় নিশ্চিত বুলি ধাৰণা কৰা হৈছে। যদিহে আশা কৰা ধৰণে তেওঁ ৰাষ্ট্ৰপতি নিৰ্বাচিত হয় তেন্তে তেওঁ দেশৰ প্ৰথমগৰাকী মহিলা জনজাতীয় ৰাষ্ট্ৰপতি চিহ্নিত হ'ব।

তেওঁক সাক্ষাৎ কৰাৰ কৰাৰ কথা প্ৰধানমন্ত্ৰী মোদীয়ে টুইটযোগে এই বিষয়ে সদৰি কৰে। তেওঁ কয়, "মই আজি দ্ৰৌপদী মুৰ্মুক সাক্ষাৎ কৰিলোঁ আৰু তেওঁক শুভেচ্ছা জ্ঞাপন কৰিলোঁ। তেওঁক ৰাষ্ট্ৰপতি পদৰ প্ৰাৰ্থী হিচাপে মনোনীত কৰাটোৱে সমগ্ৰ দেশৰ সমাজৰ সকলো শ্ৰেণীৰ পৰা সমৰ্থন লাভ কৰিছে। ভাৰতৰ উন্নয়নৰ বাবে তেওঁৰ দৃষ্টিভংগী আৰু দেশৰ তৃণমূল সমস্যাৰ বিষয়ে তেওঁৰ বুজাবুজি অতুলনীয়।

দিল্লীলৈ দ্ৰৌপদী মুৰ্মুৰ আগমনৰ পাছতে, বিজেপিৰ ৰাজ্যিক সভাপতি আদেশ গুপ্তা, দলৰ সাংসদ মনোজ তিৱাৰী আৰু দিল্লী বিধানসভাৰ বিৰোধী দলৰ নেতা ৰমেশ বিধুৰী আৰু তেওঁৰ লগতে দিল্লী বিজেপিৰ কেইবাজনো নেতাই বিমানবন্দৰত মুৰ্মুক আদৰণি জনায়। সূত্ৰ অনুসৰি, তেওঁৰ মনোনয়ন সম্পৰ্কীয় নথিপত্ৰ সংসদীয় পৰিক্ৰমা মন্ত্ৰী প্ৰহ্লাদ যোশীৰ বাসগৃহত প্ৰস্তুত কৰা হৈছে। প্ৰধানমন্ত্ৰী মোডী, প্ৰতিৰক্ষা মন্ত্ৰী ৰাজনাথ সিং, অমিত শ্বাহ আৰু বিজেপিৰ ৰাষ্ট্ৰীয় সভাপতি জে পি নাড্ডা তেওঁৰ প্ৰস্তাৱক হ'ব।

কেন্দ্ৰীয় মন্ত্ৰী আৰু জ্যেষ্ঠ বিজেপি নেতাসকলে যোশীৰ বাসগৃহত প্ৰস্তাৱক আৰু সমৰ্থক হিচাপে নথিপত্ৰত স্বাক্ষৰ কৰিছে। বিজু জনতা দলৰ সস্মিত পাত্ৰও নথিপত্ৰত স্বাক্ষৰ কৰাসকলৰ ভিতৰত আছে। উল্লেখ্য যে, বিজেডিয়ে মুৰ্মুৰ মনোনয়ন সমৰ্থন কৰিছে।

ৰাষ্ট্ৰীয় ৰাজধানী লৈ ৰাওনা হোৱাৰ পূৰ্বে উৰিষ্যাত এক চমু বিবৃতিত মুৰ্মুৱে কয়, "মই সকলোকে ধন্যবাদ জনাইছোঁ আৰু ৰাষ্ট্ৰপতি নিৰ্বাচনৰ বাবে সকলোৰে সহযোগিতা বিচাৰিছোঁ। মই ১৮ জুলাইৰ আগতে সকলো সাংসদ ভোটাৰক লগ ধৰিম আৰু তেওঁলোকৰ সমৰ্থন বিচাৰিম। উল্লেখ্য যে, ৰাষ্ট্ৰপতি পদৰ বাবে ভোটদান ১৮ জুলাইত অনুষ্ঠিত হ'ব। বৰ্তমানৰ ৰাষ্ট্ৰপতি ৰামনাথ কোবিন্দৰ কাৰ্যকাল ২৪ জুলাইত শেষ হ'ব।