ডিজিটেল ডেস্কঃ ২৭ বছৰীয়া এজন যুৱকৰ মলদ্বাৰত আৱদ্ধ হৈ আছিল এটা ডিঅ’ড্ৰেণ্টৰ বটল। যুৱকজনৰ শৰীৰৰ এক্স-ৰে কৰি হতভম্ব হৈ পৰে চিকিৎসক। এই অদ্ভুত ঘটনাটো সংঘটিত হৈছে পশ্চিম বংগৰ বৰ্ধমানত। বৰ্ধমান চিকিৎসা মহাবিদ্যালয়ৰ চিকিৎসকৰ দলটোৱে ইয়াৰ পূৰ্বে এনে কোনো ঘটনা প্ৰত্যক্ষ কৰা নাছিল বুলি সদৰী কৰে।
পেটৰ তলৰ অংশত তীব্ৰ বিষ হোৱাত যুৱকজনক বৰ্ধমান চিকিৎসা মহাবিদ্যালয়ত ভৰ্তি কৰায় পৰিয়ালৰ লোকে। চিকিৎসকে জনোৱা মতে, ডিঅ’ড্ৰেণ্টৰ বটলটো প্ৰায় তিনি সপ্তাহ ধৰি ৰোগীৰ নিতম্বৰ ভিতৰত আবদ্ধ হৈ আছিল। অস্ত্ৰোপচাৰৰ জৰিয়তে ইয়াক বাহিৰ কৰা হৈছে। এই অস্ত্ৰোপচাৰটো একেবাৰে সহজ নাছিল।
চিকিৎসকে এক্স-ৰে কৰি গম পালে যে প্ৰায় সাড়ে সাত ইঞ্চিৰ ডিঅ’ড্ৰেণ্টৰ এটা বটল আবদ্ধ হৈ আছে ৰোগীৰ মলদ্বাৰৰ ওচৰত। যুৱকজনৰ লগত কথা পাতি চিকিৎসকে গম পায় যে চিকিৎসালয়লৈ অহাৰ আগতে ২০ দিন এনে অৱস্থাতে কটায় যুৱকজনে। অৱশেষত তেওঁ বিষত ৰ’ব নোৱাৰি ততাতৈয়াকৈ হস্পিতাললৈ গ’ল। কিন্তু সেই বটলটো কেনেকৈ তেওঁৰ মলদ্বাৰত সোমাই গ’ল, চিকিৎসকে সেই প্ৰশ্ন হাজাৰবাৰ কৰাৰ পাছতো যুৱকজনে একো উত্তৰ নিদিলে।
অস্ত্ৰোপচাৰৰ পাছত চিকিৎসকৰ হাতত বিশেষ ডিঅ’ড্ৰেণ্টৰ বটলটো
চিকিৎসকসকলে বহু কঠিন অস্ত্ৰোপচাৰৰ সম্পন্ন কৰি যুৱকজনৰ দেহৰ পৰা ডিঅ’ড্ৰেণ্টৰ বটলটো বাহিৰ কৰে। অস্ত্ৰোপচাৰৰ দ্বাৰা বটলটো বাহিৰ কৰা হল যদিও ৰোগীজন সম্পূৰ্ণ সুস্থ হৈ উঠা নাই। চিকিৎসকে জনোৱা মতে, তেওঁৰ খাদ্যনলী আৰু অন্ত্ৰ, দুয়োটা যথেষ্ট ক্ষতিগ্ৰস্ত হৈছে। চিকিৎসকে কয় যে এই আঘাতৰ বাবে ভৱিষ্যতে আৰু বৃহৎ অস্ত্ৰোপচাৰৰ প্ৰয়োজন হ’ব পাৰে। ৰোগীৰ অৱস্থা এতিয়াও সংকটজনক।
Continue Reading
