ডিজিটেল ডেস্ক: হঠাৎ মল্লযোদ্ধাৰ প্ৰতিবাদত ভাঙোন আনিবলৈ অপচেষ্টা চলিছে এটা বিশেষ চক্ৰৰ৷ শনিবাৰে অমিত শ্বাহক সাক্ষাৎ কৰিছিল মল্লযোদ্ধাৰ প্ৰতিবাদকাৰীৰ এটা দলে৷ তাৰ পাছত আজি অকস্মাতে খবৰ বিয়পি পৰিল যে সাক্ষী মালিক আঁতৰি আহিছে আন্দোলনৰ পৰা৷ নিমিষতে এই খবৰ বিয়পি পৰিল দেশত৷ তাৰ পাছতেই তাৎক্ষণিক প্ৰতিক্ৰিয়া ব্যক্ত কৰিছে সাক্ষী মালিকে৷ আন্দোলন ত্যাগৰ বাতৰিক অস্বীকাৰ কৰিছে সাক্ষী মালিকে৷
খবৰ অনুসৰি, ৰে’ল বিভাগৰ চাকৰিত পুনৰ যোগদান কৰিব সাক্ষী মালিকে৷ সাক্ষী মালিকে এটা টুইটত স্পষ্ট কৰি দিছে যে তেওঁ নিজকে প্ৰতিবাদৰ পৰা আঁতৰোৱা নাই, কেৱল তেওঁৰ চৰকাৰী চাকৰিৰ সেৱালৈহে ঘূৰি আহিছে।
শনিবাৰে গৃহমন্ত্ৰী অমিত শ্বাহ আৰু প্ৰতিবাদকাৰী মল্লযোদ্ধাসকলৰ মাজত দিল্লীত শ্বাহৰ বাসভৱনত এখন বৈঠক অনুষ্ঠিত হৈছিল আৰু নিশালৈকে চলা এই বৈঠকত মল্লযোদ্ধাসকলে ব্ৰীজভূষণ সিঙৰ গ্ৰেপ্তাৰৰ দাবী উত্থাপন কৰিছিল।
সাক্ষী মালিকৰ স্বামী সত্যব্ৰত কাদিয়ানে কয় যে শনিবাৰে অনুষ্ঠিত গৃহমন্ত্ৰী অমিত শ্বাহৰ সৈতে মল্লযোদ্ধাসকলৰ বৈঠক অমীমাংসিত আছিল, কিয়নো তেওঁলোকে গৃহমন্ত্ৰীৰ পৰা বিচৰা প্ৰতিক্ৰিয়া পোৱা নাছিল।
প্ৰতিবাদকাৰী মল্লযোদ্ধাসকলে গংগাত পদক বিসৰ্জন দিবলৈ হৰিদ্বাৰলৈ যোৱাৰ কেইদিনমান পাছত গৃহমন্ত্ৰীৰ সৈতে বৈঠক অনুষ্ঠিত হৈছিল, কিন্তু কৃষক নেতা নৰেশ টিকাইটে তেওঁলোকক বাধা দিছিল। তেওঁলোক উভতি অহাৰ পাছত ৯ জুনৰ আগতে বিজেপি সাংসদ ব্ৰীজভূষণ সিঙক গ্ৰেপ্তাৰ কৰাৰ সময় নিৰ্ধাৰণ কৰি দিছিল৷ এতিয়ালৈকে, ব্ৰজ ভূষণৰ বিৰুদ্ধে দুখন এজাহাৰ দাখিল কৰা হৈছে আৰু তেওঁৰ বিৰুদ্ধে পকচো আইনৰ অধীনত গোচৰ ৰুজু কৰা হৈছে।
Continue Reading
