ডিজিটেল ডেস্কঃ যেন কিবা শনিহে লাগিছে ভাৰতীয় ৰে’ল বিভাগত। ওড়িশাত চাৰি খনকৈ ৰে’ল দুৰ্ঘটনাত পতিত হোৱাৰ পিছত সোমবাৰে এক ভয়ংকৰ দুৰ্ঘটনাৰ পৰা ৰক্ষা পৰিল কোল্লাম-চেন্নাই এক্সপ্ৰেছ। আজি ৰে’লখনৰ এটা কম্পাৰ্টমেণ্টৰ তলত এটা ফাট ধৰা পৰে। বিষয়টো এজন ৰেল কৰ্মীৰ দৃষ্টিগোচৰ হোৱাৰ ফলতে ভয়ংকৰ দুৰ্ঘটনাৰ পৰা ৰক্ষা পৰিল ৰে’ল খন।
এই মাৰাত্মক কথাটো ধৰা পৰাৰ পিছতে ৰে’ল খনৰ সেই দবাটো তৎক্ষণাৎ সলনি কৰা হয়। । ঘটনাটো তামিলনাডুৰ চেংগোটাই ষ্টেচনত সংঘটিত হৈছে। ৰে'লকৰ্মীসকলেপ্ৰকাশ কৰা মতে যদি ফাটটো লক্ষ্য কৰা নহ'লহেঁতেন, তেন্তে এটা ডাঙৰ দুৰ্ঘটনা ঘটাৰ আশংকা আছিল।
ইপিনে বহু যাত্ৰীয়ে এইবুলি অভিযোগ কৰিছে যে বন্দে ভাৰতৰ দৰে দ্ৰুত ৰেল চলোৱাৰ প্ৰতিযোগিতাৰ বাবেই চৰকাৰে এতিয়া এক্সপ্ৰেছ ৰে’লৰ আন্তঃগাঁথনিৰ বিষয়টোলৈ চকু নিদিয়া হৈছে। ফলত সাধাৰণ এক্সপ্ৰেছ ৰে’লৰ যাত্ৰীসকল বিপদৰ সন্মুখীন হৈছে। কোল্লাম-চেন্নাই এক্সপ্ৰেছৰ ঘটনাই পুনৰ যাত্ৰীৰ সুৰক্ষাৰ বিষয়ত একেই প্ৰশ্ন উত্থাপন কৰিছে।
দক্ষিণ ৰে'লৱেৰ এজন কৰ্মচাৰীয়ে কয়, "ৰে’লখনে তামিলনাডুৰ চেংগোটাই ষ্টেচনত উপস্থিত হোৱাৰ সময়তে এজন ৰে’ল কৰ্মীয়ে ৰে’লৰ কম্পাৰ্টমেণ্টৰ তলত এটা ফাট দেখিছিল। ফাটটো দেখাৰ পিছত ৰে’লখনৰ কম্পাৰ্টমেণ্টটো সলনি কৰা হৈছিল।’’ৰে'ল কৰ্মচাৰীজনক পুৰস্কৃত কৰা হ'ব বুলি জানিব পৰা গৈছে।
Continue Reading
