মল্লযুঁজাৰুৰ প্ৰতিবাদঃ নতুন সংসদলৈ পদযাত্ৰাৰ পূৰ্বে আটক বিনেশ ফোগাট, সাক্ষী মালিক, বজৰং পুনিয়া

ইয়াৰ পূৰ্বে মল্লযুঁজাৰু বিনেশ ফোগাটে অভিযোগ কৰিছিল যে আজি নতুন সংসদ ভৱনত পৰিকল্পিত ‘মহিলা সন্মান মহাপঞ্চায়ত’ৰ পূৰ্বে প্ৰতিবাদকাৰী মল্লযুঁজাৰুসকলৰ সমৰ্থকসকলক আটক কৰি ৰখা হৈছিল। তেওঁৰ অফিচিয়েল টুইটাৰ একাউণ্টত প্ৰকাশ কৰা এটা ভিডিঅ’ত তেওঁ কয় যে “গণতন্ত্ৰক মুকলিকৈ হত্যা কৰা হৈছে”। লগতে কয় যে জাতিটোৱে মনত ৰাখিব যে কেনেকৈ “নতুন সংসদ উদ্বোধন হোৱাৰ সময়ত নিজৰ অধিকাৰ দাবী কৰা মহিলাসকলক দমন কৰা হৈছিল”। নতুন সংসদলৈ মল্লযুঁজাৰুৰ প্ৰতিবাদী সমদলৰ পূৰ্বে সিংহু, টিকৰি, গাজীপুৰকে ধৰি দিল্লী সীমান্তত নিৰাপত্তা বৃদ্ধি কৰা হয়। দিল্লী আৰক্ষীয়ে জনোৱা মতে, প্ৰতিবাদকাৰীক খাপ পঞ্চায়তত যোগদান কৰাত বাধা দিবলৈ কোৱা হৈছে।আৰক্ষীৰ এজন বিষয়াই কয় যে‘আমি এতিয়াও কাকো আটক কৰা নাই। আমি কৃষকসকলক যাবলৈ ক’ম কাৰণ তেওঁলোকৰ প্ৰতিবাদে নতুন সংসদ ভৱনৰ উদ্বোধনী অনুষ্ঠানত ব্যাঘাত জন্মাব৷'

ইফালে, আৰক্ষীয়ে হাৰিয়ানাৰ বি কে ইউ হাৰিয়ানাৰ মুৰব্বী গুৰনাম সিং চাডুনীকে ধৰি কেইবাজনো কৃষক নেতাক ঘৰত আটক কৰি ৰাখিছে। অভিযোগ অনুসৰি তেওঁলোকে প্ৰতিবাদকাৰী মল্লযুঁজাৰুৰ সমৰ্থনত দিল্লীলৈ সমদল উলিওৱাৰ পৰিকল্পনা কৰিছিল৷ আন এক খবৰ অনুসৰি আজি নতুন সংসদ ভৱন উদ্বোধনৰ পূৰ্বে আইন-শৃংখলাৰ পৰিস্থিতিৰ প্ৰতি লক্ষ্য ৰাখি দিল্লী আৰক্ষীয়ে বাহিৰৰ দিল্লীৰ পুৰণি বাৱানাৰ এখন এমচিডি বিদ্যালয়ত অস্থায়ী কাৰাগাৰ স্থাপন কৰিছে।