ডিজিটেল ডেস্কঃ এক মৰ্মান্তিক ঘটনা সংঘটিত হৈছে ডেৰাডুনত ৷ এটা নাহৰফুটুকী বাঘে চোতালত খেলি থকা এটি চাৰি বছৰীয়া শিশুক টানি নিয়াৰ বহু সময় পিছত শিশুটিৰ মৃতদেহ অৰণ্যত উদ্ধাৰ হৈছে৷ উত্তৰাখণ্ডৰ পাহাৰীয়া অঞ্চলৰ উপৰি এতিয়া আৱাসিক অঞ্চলসমূহতো বাঘৰ সন্ত্ৰাস বৃদ্ধি পাইছে।
ডেৰাডুনৰ ওচৰৰ এখন গাঁৱত ভাগে মঙলবাৰে ঘৰৰ চোতালত খেলি থকা এটা শিশুক টানি লৈ গৈছিল। লগে লগে শিশুটিক বিচাৰি পৰিয়ালৰ লোকে চলাথ কৰিছিল৷ খবৰ দিয়া হৈছিল বন বিভাগকো৷ বন বিভাগৰ লোকে আহি ঘৰৰ কাষৰীয়া অৰণ্যত ওৰে নিশা শিশুটিৰ সন্ধান কৰে যদিও আজি শিশুটিৰ মৃতদেহ উদ্ধাৰ হয়৷
চিন্তিত পৰিয়ালটোৱে এছএছপি অজয় সিঙক ঘটনাটোৰ বিষয়ে অৱগত কৰিছিল। আৰক্ষীয়ে চাৰি বছৰীয়া ল’ৰাটিক বন বিভাগৰ সহযোগত বিচাৰি আছিল৷ অৱশেষত বুধবাৰে অৰণ্যৰ পৰা শিশুটিৰ মৃতদেহ উদ্ধাৰ কৰা হয়।
বাঘৰ আক্ৰমণত এনেদৰে শিশুটিৰ মৃত্যু ঘটাত সমগ্ৰ এলেকাটোতে শোকৰ ছাঁ পৰিছে৷ উল্লেখ্য উত্তৰাখণ্ডৰ পাহাৰীয়া অঞ্চলত বাঘে বহু লোকক আক্ৰমণ কৰিছে৷ কিন্তু এনেদৰে ঘৰৰ পৰাই শিশুক টানি নিয়াৰ ঘটনা খুব কমেইহে ঘটিছে৷ বাঘে এতিয়া জনবসতি প্ৰধান এলেকাতো প্ৰৱেশ কৰি ত্ৰাসৰ সৃষ্টি কৰিছে৷
Continue Reading
