মৰ্মান্তিক! ট্ৰেন্সফৰ্মাৰৰ বিস্ফোৰণত স্কুটি আৰোহী পিতা-পুত্ৰীৰ কৰুণ মৃত্যু

ডিজিটেল ডেস্কঃ এক শােকাৱহ ঘটনাত প্ৰাণ হেৰুৱালে এহাল পিতৃ আৰু কন্যাই। দুয়ো স্কুটিৰে আহি থাকোতে পথৰ দাঁতিত থকা এটা ট্ৰেন্সফ’ৰ্মাৰ হঠাতে বিস্ফােৰণ ঘটে আৰু এই বিস্ফােৰণত কৰুণ মৃত্যুক সাবটে পিতা-পুত্ৰীয়ে। এই ঘটনা সংঘটিত হৈছে কৰ্ণাটকৰ দক্ষিণ বাংগালুৰুৰ নাইচ ৰোডত। বুধবাৰে দুপৰীয়া সংঘটিত বৈদ্যুতিক ট্ৰেন্সফৰ্মাৰ বিস্ফোৰণৰ ফলত এজন ৫৫ বছৰীয়া শিৱৰাজ আৰু তেওঁৰ ১৯ বছৰীয়া কন্যা চৈতন্যাৰ মৃত্যু হয়। গুৰুতৰভাৱে অগ্নিদগ্ধ হোৱাৰ পাছত জীৱন-মৃত্যুৰ সৈতে যুঁজি যুঁজি অৱশেষত বৃহস্পতিবাৰে মৃত্যুক সাবটি লয় চৈতন্যাই। আনহাতে ঘটনাটো সংঘটিত হোৱাৰ কেইঘণ্টামান পাছতেই তেওঁৰ পিতৃ শিৱৰাজৰ মৃত্যু হয়। চৈতন্যাৰ আঙুঠি পিন্ধোৱা অনুষ্ঠানৰ বাবে এটা হল বুক কৰাৰ পাছত পিতৃ-কন্যাই স্কুটিত ঘৰলৈ উভতি অহাৰ সময়তে এই অঘটন ঘটে। যেন দুয়োৰে বাবে ৰাস্তাত ৰৈ আছিল কাল নিয়তি। ট্ৰেন্সফৰ্মাৰ বিস্ফোৰণৰ ফলত ট্ৰেন্সফৰ্মাৰৰ পৰা নিৰ্গত তেলে স্কুটিখন আৱৰি ধৰাত তেওঁলোক গুৰুতৰভাৱে অগ্নিদগ্ধ হৈছিল। নাগাৰ্ভৱী অগ্নি নিৰ্বাপক কেন্দ্ৰৰ পৰা এখন পানীৰ টেংকাৰ ঘটনাস্থলীলৈ প্ৰেৰণ কৰা হৈছিল আৰু ই ট্ৰেন্সফৰ্মাৰ আৰু বাইকৰ জুই নুমুৱাইছিল। স্থানীয় বিধায়ক এছ টি সোমাশেকাৰৰ নিৰ্দেশৰ পাছত জ্ঞানভৰ্থী আৰক্ষীয়ে অপৰাধমূলক অৱহেলাৰ বাবে বেচকমৰ কাৰ্যবাহী অভিযন্তা আৰু অন্যান্য বিষয়াসকলৰ বিৰুদ্ধে এজাহাৰ দাখিল কৰিছে। স্থানীয় বাসিন্দাসকলে দাবী কৰিছে যে তেওঁলোকে ট্ৰেন্সফৰ্মাৰৰ পৰা তেল নিৰ্গত হোৱাৰ বিষয়ে বেচকমক পূৰ্বৰ পৰাই অভিযোগ কৰি আহিছিল যদিও তেওঁলোকে কোনো ব‍্যৱস্থা গ্ৰহণ কৰা নাছিল। এই ঘটনাই সমগ্ৰ অঞ্চলজুৰি পেলাইছে গভীৰ শোকৰ ছাঁ। আৰু পঢ়কঃ ৰে’লৰ খুন্দাত ময়ূৰৰ মৃত্যু!৪০ মিনিট ৰে’ল ৰখাই ৰাজ্যিক সন্মানেৰে ৰাষ্ট্ৰীয় পক্ষীক অন্তিম বিদায়