মনৰ সুখেই আচল সুখ; ৪০ লাখ টকাৰ দৰমহাৰ চাকৰি এৰি ছাফাইকৰ্মী হ'ল মহিলা!

ডিজিটেল ডেস্কঃ জীৱনত এটা ডাঙৰ কাম বা এটা ডাঙৰ চাকৰি কৰাৰ সপোন সকলোৱে দেখে। জীৱনত কিবা এটা কাম কৰি থাকোতে কেনেকৈ অন্য এটা ডাঙৰ কাম কৰিব পাৰি তাৰে চিন্তাত মগন থাকে মানুহ। এইখিনিতে এগৰাকী ব্যতিক্ৰমী মহিলাৰ কথা পোহৰলৈ আহিছে। মহিলাগৰাকীৰ নাম ক্লেয়াৰ বাৰ্টন। তেওঁ ব্ৰিটেইনৰ বাসিন্দা। ৪০ লাখ টকা দৰমহা পোৱা এটা চাকৰি কৰি আছিল ক্লেয়াৰে। আপুনি শুনি আচৰিত হ'ব যে ইমান লোভনীয় দৰমহাৰ চাকৰি এৰি তেওঁ হলগৈ এগৰাকী ছাফাইকৰ্মী। এই নতুন কামক লৈ তেওঁ বহু সুখী। ক্লেয়াৰে কয় যে কৰ্পোৰেট খণ্ডত চাকৰি কৰাতকৈ এগৰাকী ছাফাইকৰ্মী হিচাপে কাম কৰি তেওঁ বেছিকৈ জীৱনৰ সুখ লাভ কৰিছে আৰু এইটো তেওঁৰ জীৱনৰ সৰ্বশ্ৰেষ্ঠ পদক্ষেপ। ক্লেয়াৰ বাৰ্টনে বৰ্তমান ছটা ঘৰত ছাফাইকৰ্মী হিচাপে কাম কৰি আছে।

২০১৭ চনত ক্লেয়াৰ বাৰ্টনে তেওঁৰ পিতৃক হেৰুৱায়। তেওঁৰ পিতৃ যকৃতৰ কৰ্কট ৰোগত আক্ৰান্ত হৈ আছিল। সেই দুখ মাৰ নাযাওতেই ২০১৮ বৰ্ষত তেওঁৰ স্বামীৰ সৈতে বিবাহ বিচ্ছেদ ঘটে। ২০০৩ চনত প্ৰেমিক ডেভৰ সৈতে বিবাহপাশত আৱদ্ধ হৈছিল ক্লেয়াৰ বাৰ্টন। দুটাকৈ মোক্ষম আঘাত পাই দুখত ভাগি পৰিছিল ক্লেয়াৰ। সেই সময়ত তেওঁ নিজকে বৰ অকলশৰীয়া অনুভৱ কৰিছিল। এনে সময়তে তেওঁ নিজ ঘৰতে এটা কথা লক্ষ্য কৰিছিল যে তেওঁৰ ঘৰটো বনকৰা মহিলাগৰাকীয়ে খুব সুন্দৰকৈ পৰিষ্কাৰ-পৰিচ্ছন্ন কৰি ৰাখে। তেওঁ দিনটোলৈ চাকৰিলৈ ওলাই যায় বাবে ঘৰ পৰিষ্কাৰ কৰাৰ সময় নাপায় কিন্তু বনকৰা মহিলাগৰাকীয়ে সেই কাম অতি সুন্দৰকৈ আৰু নিয়াৰিকৈ কৰি থয়। তেতিয়াই তেওঁ উপলব্ধি কৰিছিল যে মানৱ জীৱনত পৰিষ্কাৰ পৰিচ্ছন্নতা কিমান গুৰুত্বপূৰ্ণ।

কৰ'না আৰু লকডাউনৰ সময়ছোৱাত ঘৰৰ সমস্ত কাম তেওঁ অকলেই কৰিব লগা হৈছিল। পৰিষ্কাৰ-পৰিচ্ছন্নতাৰ পৰা আদি কৰি সকলোখিনি কাম কৰি তেওঁ সিদ্ধান্ত লৈছিল যে চাকৰি এৰি দি এগৰাকী ছাফাইকৰ্মী হোৱাই ভাল। এই কথা মনলৈ অহাৰ লগে লগেই ক্লেয়াৰে চাকৰি বাদ দি এগৰাকী ছাফাইকৰ্মী হৈ পৰে। তেওঁ এতিয়া ছটা ঘৰত ছাফাইকৰ্মী হিচাপে কাম কৰি আছে। ক্লেয়াৰ বাৰ্টনে কয় যে "এইটো সঁচা যে মোৰ উপাৰ্জন বহুত হ্ৰাস পাইছে, কিন্তু মই সুখী। দৰাচলতে মানুহে কিমান টকা উপাৰ্জন কৰিছে সেই কথা ডাঙৰ নহয় মনে আনন্দ পোৱা কাম কৰি জীয়াই থকাটো গুৰুত্বপূৰ্ণ আৰু মই এই কাম কৰি জীৱনৰ সুখ বিচাৰি পাইছোঁ…এয়াই মোৰ বাবে যথেষ্ট।''

আৰু পঢ়কঃ নৱবৰ্ষ উদযাপন নকৰিব! সতৰ্কবাণী লিখি ঠায়ে ঠায়ে লগাইছে পোষ্টাৰ