এয়াই সেই কিম জং উন হয়নে? ক্ষীণ চেহেৰাৰ কিমৰ ফটোৱে বিশ্বত তুলিছে খলকনি!

ডিজিটেল ডেস্কঃ এয়াই সেই কিম জং উন হয়নে…এই সময়ত বিশ্বৰ প্ৰায় প্ৰতিজনেই কৰিছে এই প্ৰশ্ন। চেহেৰা দেখি চিনিবলৈকে টান হৈ পৰিল উত্তৰ কোৰিয়াৰ একছত্ৰী শাসক কিম জং উনক। সমগ্ৰ বিশ্বৰে সংবাদমাধ্যমত একপ্ৰকাৰ খলকনিৰ সৃষ্টি কৰিছে কিম জং উনৰ এখন ফটোৱে। কিম জং উনে ভাষণ দি থকা অৱস্থাত তোলা এখন ফটোৱে সকলোৰে দৃষ্টি আকৰ্ষণ কৰিছে। মানুহে বিশ্বাস কৰিবলৈকে টান পাইছে যে এয়াই সেইজন কিম জং উন। উত্তৰ কোৰিয়াৰ একছত্ৰী শাসক কিম আছিল একেবাৰে শকত আৱত চেহেৰাৰ। মঙহৰ ভৰত তেওঁৰ দুগাল উলমি থাকে। শৰীৰৰ মাংসৰ ভৰৰ বাবে কিম জং উনৰ ডিঙিও নথকাৰ দৰে। কিন্তু সেই কিম জং উন এতিয়া অতীত হ'ল।

৩৭ বছৰীয়া কিম জং উনৰ এই ফটো সামাজিক মাধ্যত ভাইৰেল হৈ পৰিছে। উত্তৰ কোৰিয়াৰ প্ৰাক্তন শাসক তথা পিতৃ কিম জং ইলৰ মৃত্যু বাৰ্ষিকীৰ এক অনুষ্ঠানত অংশ লৈছিল পুত্ৰ কিমে। সেই অনুষ্ঠানতেই নতুন ৰূপত দেখা যায় নেতাগৰাকীক। দেশখনৰ সংবাদ মাধ্যমত প্ৰকাশিত খবৰ অনুসৰি কিমৰ নতুন ফটোখন ২৮ ডিচেম্বৰৰ।

ফটোখন দেখি বহুতো লোকে কৈছে কিমে শৰীৰৰ পৰা প্ৰায় ৪০ পাউণ্ড মান ওজন হ্ৰাস কৰিছে। আনহাতে দেশখনৰ চৰকাৰী সূত্ৰে প্ৰকাশ কৰা অনুসৰি কিমে কমকৈ খাদ্য গ্ৰহণ কৰা আৰম্ভ কৰিছে। দেশখনত দেখা দিয়া ভয়াৱহ খাদ্য সংকটৰ বাবেই দেশৰ জনসাধাৰণকো কমকৈ খাদ্য গ্ৰহণৰ বাবে আহ্বান নিজেও কমকৈ খাদ্য গ্ৰহণ কৰি আছে। পিছে এই কথাৰ সত্যতা নিৰূপণ কৰাৰ কোনো উপায় নাই। কিমে সঁচাকৈয়ে কমকৈ খাদ্য গ্ৰহণ কৰা কাৰণে ওজন হ্ৰাস পাইছে নে ব্যায়াম কৰি ওজন হ্ৰাস কৰিছে সেয়া প্ৰশ্ন কৰাৰ সাহস কাৰোৰে নাই। সকলোৱে কিন্তু কিম জং উনৰ এই নতুন ৰূপৰ প্ৰশংসা কৰিছে।