ডিজিটেল ডেস্কঃ কানাডাত পুনৰ মন্দিৰৰ ওপৰত আক্ৰমণ চলালে খালিস্তানী সমৰ্থকে। খালিস্তান পন্থী সমৰ্থকসকলে কানাডাৰ এটা হিন্দু মন্দিৰ লণ্ডভণ্ড কৰিছে। মন্দিৰৰ দুৱাৰত খালিস্তানী পোষ্টাৰো পোৱা গৈছে।পোষ্টাৰত এখন স্বতন্ত্ৰ খালিস্তান সৃষ্টিৰ বাবে গণভোটৰ আহ্বান জনোৱা হৈছে। শনিবাৰে মাজনিশা সংঘটিত এই ঘটনাই কানাডাৰ ব্ৰিটিছ কলম্বিয়া প্ৰদেশত চাঞ্চল্যৰ সৃষ্টি কৰিছে। স্থানীয় হিন্দু সম্প্ৰদায়ে ঘটনাটোক তীব্ৰ ভাষাৰে গৰিহণা দিছে। আৰক্ষীয়ে ঘটনাটোৰ তদন্ত কৰি আছে।
শনিবাৰে নিশা ব্ৰিটিছ কলম্বিয়াৰ চাৰেৰ লক্ষ্মী নাৰায়ণ মন্দিৰত খালিস্তানী সমৰ্থকে আক্ৰমণ চলায়। এই মন্দিৰটো কানাডাৰ আটাইতকৈ বিখ্যাত আৰু বৃহৎ মন্দিৰ সমূহৰ মাজৰে এটা। মন্দিৰত আঁৰি দিয়া পোষ্টাৰত লিখা আছে "কানাডাই ১৮ জুনৰ গণহত্যাত ভাৰত জড়িত থকাৰ প্ৰমাণ আছে।" পোষ্টাৰখনৰ সৈতে খালিস্তানী নেতা হৰদীপ সিং নিজ্জাৰৰ এখন ছবিও আছে।হৰদীপ চাৰেৰ গুৰু নানক শিখ গুৰুদ্বাৰা চাহিবৰ মুৰব্বী আছিল।
১৮ জুনৰ সন্ধিয়া দুজন অচিনাক্ত দুৰ্বৃত্তই গুৰুদ্বাৰাত আক্ৰমণ কৰিছিল। সেই আক্ৰমণত কেটিএফৰ মুৰব্বী হৰদীপ নিহত হৈছিল। ঘটনাটোৰ বিৰুদ্ধে প্ৰতিবাদ কৰিবলৈ মন্দিৰত খালিস্তান পন্থীয়ে পোষ্টাৰ লগোৱা বুলি ধাৰণা কৰা হৈছে। কানাডাৰ আৰক্ষীয়ে ঘটনাটোৰ তদন্ত কৰি আছে আৰু চিচিটিভি ফুটেজ পৰীক্ষা কৰি আক্ৰমণকাৰীৰ ধৰাৰ চেষ্টা চলাইছে। চলিত বছৰত তৃতীয়বাৰৰ বাবে কানাডাত মন্দিৰত আক্ৰমণ কৰা হৈছে। ব্ৰেম্পটনৰ মেয়ৰে ঘটনাটোক গৰিহণা দিছে।
Continue Reading
