ডিজিটেল ডেস্কঃ মনীষ চিছ’দিয়াৰ অন্তৱৰ্তীকালীন জামিন আবেদন আজি খাৰিজ কৰে দিল্লী উচ্চ ন্যায়ালয়ে। আবকাৰী নীতিত ধন সৰবৰাহৰ অভিযোগত এনফৰ্চমেণ্ট ডাইৰেক্টৰেটৰ গোচৰত উচ্চ ন্যায়ালয়ে চিছ’দিয়াৰ জামিনৰ আবেদন নাকচ কৰে।
পত্নীৰ চিকিৎসাজনিত অৱস্থাৰ দোহাই দি চিছ’ডিয়াই আজি ছয় সপ্তাহৰ বাবে অন্তৱৰ্তীকালীন জামিনৰ অনুৰোধ জনাইছিল দিল্লী উচ্চ ন্যায়ালয়ত। চিছ’ডিয়াৰ জামিন আবেদনৰ বিৰুদ্ধে আপত্তি দৰ্শাই এনফৰ্চমেণ্ট ডাইৰেক্টৰেটে আদালতৰ সন্মুখত আবকাৰী নীতিৰ সৈতে জড়িত নথি-পত্ৰৰ প্ৰমাণ নষ্ট কৰাৰ যুক্তি প্ৰদৰ্শন কৰে।
ইয়াৰ পিছতে আদালতে চিছ’ডিয়াৰ বিৰুদ্ধে উত্থাপিত অভিযোগ অত্যন্ত গুৰুতৰ আৰু আপ নেতাগৰাকীয়ে ইতিপূৰ্বে কাৰ্যনিৰ্বাহ কৰা পদসমূহ পাহৰিব নোৱাৰি বুলি পৰ্যবেক্ষণ কৰে। আনহাতে এল এন জে পি হাস্পতালত ভৰ্তি হৈ থকা চিছ’দিয়াৰ পত্নী সীমা চিছ’দিয়া সন্দৰ্ভত চিকিৎসালয়ে দাখিল কৰা চিকিৎসা প্ৰতিবেদনৰ ওপৰতো আলোকপাত কৰে আদালতে।
এই চিকিৎসা প্ৰতিবেদনৰ প্ৰতি লক্ষ্য ৰাখি বিচাৰপীঠে সীমা চিছ’দিয়াক উত্তম চিকিৎসা প্ৰদান কৰিবলৈ নিৰ্দেশনা দিয়ে। আদালতে লগতে ৰোগীৰ চিকিৎসা ক’ত হ’ব সেয়া ৰোগী আৰু পৰিয়ালৰ নিজস্ব সিদ্ধান্ত বুলি উল্লেখ কৰে যদিও অভিভাৱক হিচাপে আদালতে এইমছৰ চিকিৎসা অধীক্ষকে গঠন কৰি দিয়া চিকিৎসকৰ ব’ৰ্ডৰ ওচৰত চিকিৎসা পৰীক্ষা কৰিব পাৰে বুলি পৰামৰ্শ দিয়ে।
উল্লেখ্য যে, যোৱা ২ জুনত দিল্লী উচ্চ ন্যায়ালয়ে চিছ’দিয়াক ৩ জুনৰ দিনটোত পুৱা ১০ বজাৰ পৰা বিয়লি ৫ বজালৈ তেওঁৰ অসুস্থ পত্নীক লগ কৰিবলৈ অনুমতি দিছিল যদিও পত্নীৰ সৈতে এই সাক্ষাতৰ সময়ত তেওঁ আৰক্ষীৰ জিম্মাত থাকিব বুলি আদালতে লগতে নিৰ্দেশনা দিছিল।
Continue Reading
