ডিজিটেল ডেস্কঃ মণিপুৰৰ ঘটনাকলৈ আজিও দেশজুৰি অব্যাহত আছে প্ৰতিক্ৰিয়া। বিৰোধীয়ে সংসদত মণিপুৰৰ বিষয়টো আলোচনা কৰিব লাগে বুলি দাবী জনাই আহিছে। সমস্যাক লৈ সমগ্ৰ দেশ অস্থিৰ হৈ পৰিছে। জাতিগত হিংসাৰ বাবে উত্তৰ-পূবৰ ৰাজ্যখনৰ পৰিস্থিতি অধিক বেয়া হৈ পৰিছে। হত্যা আৰু দলবদ্ধ ধৰ্ষণ এতিয়া মণিপুৰত যেন সহজ কথা হৈ পৰিছে।বিৰোধীয়ে মণিপুৰৰ বিষয়টোকলৈ মোদী চৰকাৰৰ ওপৰত নিৰন্তৰ হেঁচা প্ৰয়োগ কৰি আহিছে।
বিৰোধীৰ হেঁচাৰ মাজতে কেন্দ্ৰীয় গৃহ মন্ত্ৰী অমিত শ্বাহে অৱশেষত মন্তব্য প্ৰকাশ কৰিবলৈ বাধ্য হৈছে। সোমবাৰে শ্বাহে কয় যে চৰকাৰে মণিপুৰৰ বিষয়ে আলোচনা কৰিবলৈ সাজু আছে।
সোমবাৰে লোকসভাত শ্বাহে কয়, "মই লোকসভাত মণিপুৰৰ বিষয়ে আলোচনা কৰিবলৈ সাজু। মই বিৰোধীক এই বিষয়ত আলোচনাৰ বাবে বহিবলৈ অনুৰোধ জনাইছো। সমগ্ৰ দেশে এই সংবেদনশীল বিষয়টোৰ সত্যতা জানিব লাগিব।" কেন্দ্ৰীয় গৃহমন্ত্ৰীৰ মন্তব্যৰ পিছত লোকসভাৰ অধিৱেশন কাইলৈ পৰ্যন্ত স্থগিত ৰখা হয়।
সংসদৰ বৰ্ষাকালীন অধিৱেশনৰ তৃতীয় দিনাও মণিপুৰৰ ঘটনাকলৈ সংসদ উত্তেজনাপূৰ্ণ হৈ থাকে । বিৰোধী দলসমূহে প্ৰধানমন্ত্ৰী নৰেন্দ্ৰ মোদীৰ বিবৃতিৰ দাবীত ৰাজ্যসভাত প্ৰতিবাদ সাব্যস্ত কৰে। আম আদমী পাৰ্টিৰ ৰাজ্যসভাৰ সাংসদ সঞ্জয় সিঙে মণিপুৰৰ বিষয়ত আলোচনাৰ দাবীত প্ৰতিবাদকৰাৰ বাবেই ৰাজ্যসভাৰ অধ্যক্ষ জগদীপ ধনখৰে তেওঁক "সাংসদ পদক অপমান" কৰাৰ বাবে সমগ্ৰ বৰ্ষাকালীন অধিৱেশনৰ বাবে নিলম্বন কৰে। ধনখৰে টিএমচিৰ ৰাজ্যসভাৰ সাংসদ ডেৰেক অ'ব্ৰাইনক ২৬৭ ধাৰাৰ অধীনত মণিপুৰৰ বিষয়ত আলোচনা বিচাৰি প্ৰতিবাদ কৰাৰ বাবেও সতৰ্ক কৰি দিয়ে।
Continue Reading
