সমষ্টি পুনৰ নিৰ্ধাৰণ স্থগিত ৰাখিবলৈ অস্বীকাৰ উচ্চতম ন্যায়ালয়ৰ, কেন্দ্ৰ- নিৰ্বাচন আয়োগক ৩ সপ্তাহৰ ভিতৰত লিখিত উত্তৰ দিবলৈ নিৰ্দেশ

অসমৰ বিধানসভা আৰু সংসদীয় সমষ্টিৰ সীমা  ১৯৭৬ চনত অন্তিমবাৰৰ বাবে নিৰ্ধাৰণ কৰা  হৈছিল। প্ৰক্ৰিয়াটোৰ পুনৰাবৃত্তি কৰাৰ বাবে নতুন প্ৰচেষ্টা ২০০৫ চনত আৰম্ভ হৈছিল। ইয়াৰ পিছত চলিত বৰ্ষৰ  ২০ জুনত  নিৰ্বাচন আয়োগে অসমৰ সমষ্টিৰ সীমা পুনৰ নিৰ্ধাৰণৰ প্ৰথম খচৰাখন প্ৰকাশ কৰিছিল। ইয়াৰ পিছতে উদ্ভৱ হোৱা প্ৰতিবাদ আৰু  আপত্তিৰ বিষয়ে আলোচনা কৰিবলৈ নিৰ্বাচন আয়োগে গুৱাহাটীত তিনিদিনীয়া বৈঠক অনুষ্ঠিত কৰিছিল। সোমবাৰে  ১০ টা  বিৰোধী দলৰ আবেদনৰ শুনানিৰ সময়ত উচ্চতম আদালতে কেন্দ্ৰক এখন জাননী জাৰি কৰে। জাননী খনত আদালতে কেন্দ্ৰ আৰু নিৰ্বাচন আয়োগৰ পৰা আবেদনকাৰী দল তথা ব্যক্তিৰ আবেদনৰ  সঁহাৰি জনাবলৈ নিৰ্দেশ দিছে। 

আদালতে লোকসভা আৰু বিধানসভা আসনৰ সীমা নিৰ্ধাৰণ প্ৰক্ৰিয়াক  প্ৰত্যাহ্বান জনোৱা আবেদনৰ বিষয়ত  নিৰ্বাচন আয়োগৰ পৰাও উত্তৰ বিচাৰিছে৷ শীৰ্ষ আদালতে তিনি সপ্তাহৰ ভিতৰত আবেদনসমূহৰ বিষয়ত  কেন্দ্ৰ আৰু নিৰ্বাচন আয়োগৰ  পৰা উত্তৰ বিচাৰিছে  আৰু কৈছে  যে আবেদনকাৰীসকলে তাৰ পিছত দুসপ্তাহৰ ভিতৰত তেওঁলোকৰ শপতনামা  দাখিল কৰিব পাৰিব৷ অসমত ১০ বিৰোধী দল যেনে কংগ্ৰেছ, ৰাইজৰ দল, অসম জাতীয় পৰিষদ, চিপিআই(এম), চিপিআই, টিএমচি, এনচিপি, আৰজেডি আৰু আঞ্চলিক গণ মৰ্চাৰ দৰে  বিৰোধী দলক প্ৰতিনিধিত্ব কৰা দহজন নেতাৰ লগতে বিশিষ্ট বুদ্ধিজীৱী ডঃ হীৰেন গোহাইয়ে শেহতীয়াকৈ উচ্চতম ন্যায়ালয়ত নিৰ্বাচন আয়োগে চলাই  থকা সমষ্টি পুনৰ  নিৰ্ধাৰণ প্ৰক্ৰিয়াক প্ৰত্যাহ্বান জনাই আবেদন দাখিল কৰিছিল। এই বিষয়ত আদালতত আন দুটা আবেদনো বিচাৰাধীন হৈ আছে। 

আবেদনকাৰীসকলে নিৰ্বাচনী পেনেলৰ দ্বাৰা গ্ৰহণ কৰা পদ্ধতি আৰু ২০  জুন, ২০২৩ তাৰিখৰ প্ৰস্তাৱসমূহক বিশেষভাৱে প্ৰত্যাহ্বান জনাইছে। উল্লেখ্য খচৰা প্ৰকাশৰ পিছতে  নিৰ্বাচন আয়োগে অসমৰ সমষ্টিৰ পুনৰ নিৰ্ধাৰণৰ প্ৰস্তাৱৰ বিষয়ত তিনিদিনীয়া ৰাজহুৱা শুনানি অনুষ্ঠিত কৰিছিল । য'ত আয়োগে  বিভিন্ন দল-সংগঠনৰ ১,২০০ ৰো অধিক প্ৰতিনিধিত্ব মতামত লাভ কৰিছিল।