ডিজিটেল ডেস্কঃ মণিপুৰত দুগৰাকী কুকি মহিলাক উলংগ কৰি পেৰেড কৰোৱাৰ ভিডিঅ’ই দেশজুৰি প্ৰতিক্ৰিয়াৰ সৃষ্টি কৰাৰ সময়তে সেই ঘটনাত এজন মুছলমান লোকক গ্ৰেপ্তাৰ কৰা বুলি দেশৰ আগশাৰীৰ সংবাদ প্ৰতিষ্ঠান এএনআই-এ সংবাদ পৰিবেশন কৰিছিল।
মণিপুৰ আৰক্ষীয়ে ঘটনাটো সন্দৰ্ভত থৌবাল জিলাত চাৰিজন লোকক গ্ৰেপ্তাৰ কৰিছে। সেইসকলৰ ভিতৰত আব্দুল হিলিম নামৰ লোক এজনো আছে বুলি সংবাদ প্ৰতিষ্ঠানটোৱে বাতৰি দিছিল। কিন্তু পৰৱৰ্তী সময়ত ফেক্ট ছেকৰ জৰিয়তে সংবাদ প্ৰতিষ্ঠানটোৱে ভুল বাতৰি দিয়াৰ কথা পোহৰলৈ আহে। এএনআই-এ আব্দুল হিলিম নামৰ লোক জনক নগ্ন ভিডিঅ’ৰ গোচৰত গ্ৰেপ্তাৰ কৰা বুলি বাতৰি প্ৰচাৰৰ পিছতে একাংশ হিন্তুত্ববাদী লোকে মণিপুৰৰ ঘটনাটোত সাম্প্ৰদায়িকতাৰ ৰং চটিয়াই দি আনন্দ লভিছিল।
কিন্তু সেইসকল প্ৰতিক্ৰিয়াশীল লোকৰ আনন্দ নিৰানন্দত পৰিণত হ’বলৈ বেছি পৰ নালাগিল। আন এটা গোচৰত গ্ৰেপ্তাৰ হোৱা আব্দুল হিলিম নামৰ লোক জনক মণিপুৰৰ নগ্ন ভিডিঅ’ৰ গোচৰত গ্ৰেপ্তাৰ কৰা বুলি ভুৱা বাতৰি প্ৰচাৰ কৰি পিছত এএনআই-এ ক্ষমা বিচাৰিবলগীয়া হৈছে। আৰক্ষীয়ে প্ৰকাশ কৰা মতে আব্দুল হিলিম পিপলছ ৰিভলিউচনৰী পাৰ্টি অফ কাংলেইপাক নামৰ এটা বিদ্ৰোহী গোটৰ সদস্য।সেইবাবেই তেওঁক গ্ৰেপ্তাৰ কৰা হৈছে। নগ্ন ভিডিঅ’ কাণ্ডৰ সৈতে আব্দুল হিলিমৰ কোনো সম্পৰ্কই নাই।
এএনআইয়ে পিছত ক্ষমা বিচাৰি কৈছে যে সংবাদ প্ৰতিষ্ঠানটোৱে কৰা টুইটটো "অসাৱধানতাবশতঃ" পোষ্ট কৰা হৈছিল "। মণিপুৰ আৰক্ষীয়ে কৰা টুইটৰ ভুল বাখ্যা কৰা হৈছিল"।
উল্লেখ্য মাত্ৰ দুসপ্তাহ আগতেও এএনআইয়ে মণিপুৰৰ বিষয়ত এটা খবৰ প্ৰকাশ কৰি পিছত প্ৰত্যাহাৰ কৰিছিল। কিয়নো সেই বাতৰিটো এটা ভুৱা প্ৰেছ বিজ্ঞপ্তিৰ ওপৰত আধাৰিত আছিল। এনেদৰে দেশৰ এটা প্ৰতিষ্ঠিত সংবাদ মাধ্যমৰ অবিবেচক কাণ্ড আৰু সেই খবৰকলৈয়ে একাংশ হিন্দুত্ববাদীয়ে উৰ্ধবাহু নৃত্য কৰাৰ কথাই বহুতকে আচৰিত কৰি তুলিছে।
Continue Reading
