ডিজিটেল ডেস্কঃ মণিপুৰত এতিয়াও উন্নত হোৱা নাই পৰিবেশ। সেনা-চিআৰপিএফে গিজগিজাই থকাৰ পিছতো ৰাজ্য খনৰ বিভিন্ন স্থানৰ পৰা কূটাঘাত সংঘটিত হোৱাৰ খবৰ আহিয়েই আছে। এনে সময়তে ১,২০০ ৰো অধিক মহিলাই সেনাক ঘেৰাও কৰাৰ ঘটনা ঘটিছে।
মহিলাসকলে দিয়া হেঁচাৰ বাবেই সেনাই তেওঁলোক ১২ জন আটক কৰি নিয়া লোকক মুকলি কৰিবলৈ বাধ্য হয়। উল্লেখ্য সংঘৰ্ষত জড়িত থকাৰ অভিযোগত ১২ জন লোকক শনিবাৰে পুৱা সেনাই আটক কৰিছিল। তেওঁলোক মেইটেই উগ্ৰপন্থী গোট কাংলেই য়ায়ুল কান্না লুপৰ (কেৱাইকেএল) সদস্য বুলি অভিযোগ কৰা হৈছে। সংগঠনটোৱে অতীতত সেনাৰ ওপৰত চলা বহু আক্ৰমণৰ ঘটনাত জড়িত আছিল।
কিন্তু আটক কৰা বিদ্ৰোহী কেইজনক অৱশেষত সেনাই মুক্তি দিবলৈ বাধ্য হয়। এগৰাকী চৰকাৰী বিষয়াই কয় "পৰিস্থিতি সংবেদনশীল হৈ আছে । ইয়াৰ গুৰুত্ব অনুভৱ কৰি আটক কৰা লোক কেইজনক মুকলি কৰি দিয়াৰ সিদ্ধান্ত লোৱা হৈছিল। বিশাল জনতাৰ বিৰুদ্ধে বল প্ৰয়োগ কৰিলে বহু লোকৰ প্ৰাণ হানি হ’লহেঁতেন। ''
উল্লেখ্য মণিপুৰত প্ৰতিবাদত মহিলাৰ ভূমিকাই বাৰে বাৰে বহুতৰে মনোযোগ আকৰ্ষণ কৰি আহিছে। অতীতত মহিলাসকলৰ প্ৰতিৰোধৰ সন্মুখীন হৈ চিবিআইৰ তদন্তকাৰী দল এটাও ঘূৰি আহিব লগা হৈছিল । অস্ত্ৰ লুটি নিয়াৰ গোচৰৰ তদন্ত কৰি থকা চিবিআই দলটোক মণিপুৰ আৰক্ষী প্ৰশিক্ষণ মহাবিদ্যালয়ত প্ৰায় ২,০০০ মহিলাই ঘেৰি ধৰিছিল।
Continue Reading
