ডিজিটেল ডেস্ক: গোষ্ঠী সংঘৰ্ষই জুৰুলা কৰা মণিপুৰৰ পৰাই ৰাহুল গান্ধীয়ে বজালে নিৰ্বাচনী বিকুল৷ আৰম্ভ হ’ল ভাৰত জোড়ো ন্যায় যাত্ৰা৷
ৰাহুল গান্ধীয়ে দেওবাৰে মণিপুৰৰ থৌবালৰ পৰা দলটোৰ ভাৰত জোডো ন্যায় যাত্ৰা আৰম্ভ কৰে৷ এই যাত্ৰাই লোকসভা নিৰ্বাচনৰ পূৰ্বে মণিপুৰৰ পৰা মুম্বাইলৈ ১৫খন ৰাজ্যত ৬৭০০ কিলোমিটাৰৰো অধিক দূৰত্ব অতিক্ৰম কৰিব৷ যাত্ৰাৰ শুভাৰম্ভ কৰি ৰাহুল গান্ধীয়ে ৰাজ্যখনত শেহতীয়াকৈ হোৱা জাতিগত সংঘৰ্ষৰ বাবে বিজেপিক তীব্ৰ সমালোচনা কৰে৷ কংগ্ৰেছ সাংসদগৰাকীয়ে কয় যে মণিপুৰ হৈছে বিজেপিৰ ঘৃণাৰ ৰাজনীতিৰ এক উদাহৰণ৷ আৰু কয়, হয়তো নৰেন্দ্ৰ মোদী, বিজেপি আৰু আৰ এছ এছৰ বাবে মণিপুৰ ভাৰতৰ অংগ নহয়৷
তেওঁ কয়, ২৯ জুনৰ পাছত মণিপুৰ আৰু আগৰ মণিপুৰ নাছিল, ই বিভক্ত হৈ পৰিছিল আৰু সকলো ঠাইতে ঘৃণা বিয়পি পৰিছিল৷ লাখ লাখ লোক ক্ষতিগ্ৰস্ত হৈছিল। মানুহে তেওঁলোকৰ প্ৰিয়জনক তেওঁলোকৰ চকুৰ সন্মুখতে হেৰুৱাইছিল। আৰু এতিয়ালৈকে, ভাৰতীয় প্ৰধানমন্ত্ৰীয়ে আপোনালোকৰ চকুপানী মচিবলৈ আৰু আপোনালোকৰ হাতত ধৰিবলৈ ইয়ালৈ অহা নাই। এইটো এটা লজ্জাজনক কথা।
তেওঁ লগতে কয় যে বিজেপিৰ ৰাজনীতিৰ বাবে মণিপুৰে মূল্যৱান সম্পদ, সমল হেৰুৱাইছে৷ মণিপুৰত শাসনৰ আন্তঃগাঁথনি বিফল হৈছে আৰু প্ৰধানমন্ত্ৰীয়ে ৰাজ্যখন ভ্ৰমণ নকৰাটো দুৰ্ভাগ্যজনক।
ৰাহুলে কয়, মই ২০০৪ চনৰ পৰা ৰাজনীতিত আছোঁ আৰু প্ৰথমবাৰৰ বাবে মই ভাৰতত এনে এখন ঠাই ভ্ৰমণ কৰিছিলোঁ, য'ত শাসনৰ সমগ্ৰ আন্তঃগাঁথনি খহি পৰিছিল৷ মণিপুৰ বিজেপিৰ ৰাজনীতিৰ প্ৰতীক৷ মণিপুৰ হৈছে বিজেপি আৰু আৰ এছ এছৰ ঘৃণাৰ প্ৰতীক। মণিপুৰ হৈছে বিজেপিৰ দৃষ্টিভংগী আৰু আদৰ্শৰ প্ৰতীক৷ তেওঁ লগতে ৰাজ্যখনলৈ সম্প্ৰীতি আৰু শান্তি ঘূৰাই অনাৰ প্ৰতিশ্ৰুতি দিয়ে যাৰ বাবে মণিপুৰ জনাজাত আছিল৷
কংগ্ৰেছ সভাপতি মল্লিকাৰ্জুন খৰ্গে আৰু ৰাহুল গান্ধীৰ দ্বাৰা যুটীয়াভাৱে ফ্লেগ অফ কৰা ভাৰত জোড়ো ন্যায় যাত্ৰাক লোকসভা নিৰ্বাচনৰ পূৰ্বে কংগ্ৰেছৰ জনসংযোগৰ এক কাৰ্যসূচী হিচাপে গণ্য কৰা হৈছে।
কাৰ্যসূচীটোৰ সময়ত আলোচনা কৰিব লগা বিষয়বোৰ ব্যাখ্যা কৰি গান্ধীয়ে কয়, আমি ভাৰতত এক গভীৰ অন্যায়ৰ সময় সহ্য কৰি আছো - সামাজিক, অৰ্থনৈতিক আৰু ৰাজনৈতিক। মানুহ আৰু পৰম্পৰাৰ বিৰুদ্ধে অন্যায় অব্যাহত আছে, সমগ্ৰ দেশতে ব্যাপক সমস্যা আছে৷ অৰ্থনৈতিকভাৱে একচেটিয়া অধিকাৰ গঢ়ি উঠিছে৷ কেইজনমান ব্যক্তিয়ে দেশৰ সমগ্ৰ সম্পদৰ প্ৰৱেশাধিকাৰ লাভ কৰিছে। কেইটামান সংস্থাই সকলো খণ্ড নিয়ন্ত্ৰণ কৰে, যাৰ ফলত ক্ষুদ্ৰ ব্যৱসায় ধ্বংস হয়। ভাৰতে মুদ্ৰাস্ফীতি আৰু নিবনুৱাৰ সৈতে যুঁজি আছে। এই বিষয়বোৰ ভাৰত জোড়ো ন্যায় যাত্ৰাই উত্থাপন কৰিব।
Continue Reading
