ডিজিটেল ডেস্কঃ কেন্দ্ৰীয় গৃহমন্ত্ৰী অমিত শ্বাহে ভ্ৰমণ কৰি যোৱাৰ পিছতে পুনৰ উত্তপ্ত হৈ পৰিছে মণিপুৰ। শেহতীয়াকৈ ৰাজ্যখনৰ চেৰু অঞ্চলত নিৰাপত্তাৰক্ষী আৰু দুৰ্বৃত্তৰ মাজত লগা সংঘৰ্ষত বিএছএফৰ এজন জোৱান নিহত হয়।
নিহতজোৱান জনৰ নাম ৰঞ্জিত যাদৱ বুলি জানিব পৰা গৈছে। ঘটনাটোত অসম ৰাইফলছৰ দুজন কৰ্মী আহত হয় । আনহাতে দুৰ্বৃত্তৰ এটা দলে সুগানুৰ এজন কংগ্ৰেছ বিধায়কৰ ঘৰত জুই লগাই দিয়ে। উল্লেখ্য শুক্ৰবাৰে নিশা সংঘটিত সংঘৰ্ষত সুগানুত কমেও আঠজন লোক নিহত হৈছিল। এনে পৰিস্থিতিত মণিপুৰত ইণ্টাৰনেট সেৱা বন্ধ সীমিত কৰি দিয়া হৈছে। উল্লেখ্য
কুকি-মেইটেইৰ সংঘৰ্ষত মণিপুৰত এতিয়ালৈকে চৰকাৰী পৰিসংখ্যা অনুসৰি ৭৫ জন লোক নিহত হৈছে। আহতৰ সংখ্যা ১,০০০ ৰো অধিক হৈছে। হাজাৰ হাজাৰ লোক গৃহহীন হৈ পৰিছে। কিছুদিন পূৰ্বে কেন্দ্ৰীয় গৃহমন্ত্ৰী অমিত শ্বাহে শান্তি স্থাপনৰ বাবে মণিপুৰ ভ্ৰমণ কৰিছিল।
অৱশ্যে অমিত শ্বাহৰ ভ্ৰমণৰ পিছতো ৰাজ্য খনত পৰিস্থিতিৰ বিশেষ উন্নতি হোৱা নাই। অমিত শ্বাহে মণিপুৰ ত্যাগ কৰাৰ পিছত কেইবাটাও অঞ্চলত নতুনকৈ সংঘৰ্ষ আৰম্ভ হৈছে।পৰিস্থিতিৰ ওপৰত নজৰ ৰাখি ৰাজ্য চৰকাৰে ১০ জুনলৈকে ইণ্টাৰনেট সেৱা বন্ধ ৰখাৰ সিদ্ধান্ত লৈছে।
Continue Reading
