ডিজিটেল ডেস্কঃ বলীউডৰ অন্যতম সফল অভিনেতা অক্ষয় কুমাৰ। পত্নী টুইংকল খান্না আৰু দুই সন্তানৰ সৈতে অক্ষয় কুমাৰৰ আছে এখন সুখৰ সংসাৰ। নাম, যশ, টকা-পইচাৰ অভাৱ নাই অক্ষয় কুমাৰৰ।
শেহতীয়াকৈ এটা সাক্ষাৎকাৰত তেওঁ নিজৰ পুত্ৰ আৰাভৰ বিষয়ে মুকলিকৈ কয়। অক্ষয় কুমাৰে কয় যে তেওঁৰ পুত্ৰ চিনেমা উদ্যোগত কেৰিয়াৰ গঢ়িবলৈ আগ্ৰহী নহয়। অভিনেতাজনে নিজৰ পুত্ৰক সহজ-সৰল বুলি আখ্যা দিছে।
অক্ষয়ে কয়, ‘মোৰ ল’ৰা আৰাভে লণ্ডনৰ বিশ্ববিদ্যালয়ত পঢ়ি আছে। ১৫ বছৰ বয়সতে তেওঁ ঘৰৰ পৰা ওলাই আহিছিল। সদায় পঢ়া-শুনাৰ প্ৰতি আকৰ্ষিত আছিল আৰু অকলে থাকিব বিচাৰিছিল। মই তেওঁক যোৱাটো বিচৰা নাছিলোঁ যদিও স্থানান্তৰিত হোৱাৰ সিদ্ধান্ত তেওঁৰ আছিল ৷ ১৪ বছৰ বয়সতে ঘৰৰ পৰা ওলাই অহাত মই তেওঁক বাধা দিব নোৱাৰিলোঁ।”
“আৰাভে নিজৰ কাপোৰ নিজে ধোৱে, তেওঁ ভাল ৰান্ধনী, বাচন-বৰ্তনো ধোৱে আৰু দামী কাপোৰ কেতিয়াও কিনিব নিবিচাৰে। আচলতে তেওঁ টকাৰ অপচয় কৰাটো একেবাৰে ভাল নাপায়। অবাবত আৰাভে এটকাও খৰচ নকৰে। আচলতে তেওঁ সৰুৰে পৰা টকাৰ মূল্য বুজি পায়।
আৰাভে থ্ৰিফ্টী নামৰ ছেকেণ্ড হেণ্ড ষ্ট’ৰ এখনলৈ কাপোৰ কিনিবলৈ যায়। আমি কেতিয়াও তেওঁক কোনো কাম কৰিবলৈ জোৰ কৰা নাই। তেওঁ ফেশ্বনৰ প্ৰতি আগ্ৰহী, তেওঁ চিনেমাৰ অংশ হ’ব নিবিচাৰে। মোক আৰাভে কৈছিল যে মই চিনেমা কৰিব নিবিচাৰো। মই কৈছিলো এয়া তোমাৰ জীৱন, যি কৰিব বিচাৰা তাকে কৰা।’’
তেওঁলোকৰ পুত্ৰক সাধাৰণ মানুহ হিচাপে ডাঙৰ-দীঘল কৰাৰ বাবে অক্ষয় কুমাৰে পত্নী টুইংকল খান্নাক প্ৰশংসা কৰে। অক্ষয়ে লগতে কয় যে “টুইংকল আৰু মই আৰাভক যিদৰে ডাঙৰ-দীঘল কৰিছো, মই সুখী; তেওঁ এজন অতি সহজ-সৰল ল’ৰা। আনহাতে মোৰ ছোৱালীয়ে কাপোৰ ভাল পায়।’’
অক্ষয় কুমাৰৰ পুত্ৰৰ এই মনোভাৱে সকলোৰে দৃষ্টি আকৰ্ষণ কৰিছে আৰু সকলোৱে তেওঁক প্ৰশংসা কৰিছে।
উল্লেখ্য যে শেহতীয়াকৈ অক্ষয় কুমাৰ ব্যস্ত হৈ আছে জলী এল এল বি ৩ৰ কামত।
Continue Reading
