মোদী বন্দনা কৰি ভাগৰা নাই কংগনা; মোদীক শ্ৰীকৃষ্ণ আৰু সমালোচকক দুৰ্যোধন আখ্যা!

অভিনেত্ৰীগৰাকীয়ে এই বক্তব্যৰ আঁৰৰ কাৰণ উজাগৰ কৰি কয় যে, ‘মই এই কথা কোৱাৰ কাৰণটো হ’ল এইখন দেশৰ বাবে, আমাৰ বাবে তেওঁ অৱতাৰ। প্ৰধানমন্ত্ৰী কোনো সাধাৰণ মানুহ নহয়। এই দেশৰ দুখৰ পৰিত্ৰাণৰ বাবেই তেওঁ জন্ম হৈছে।’

শেহতীয়াকৈ এটা সাক্ষাৎকাৰত কংগনাই কয় যে তেওঁৰ প্ৰিয় ব্যক্তি প্ৰধানমন্ত্ৰী মোদী। ইয়াৰ উপৰিও সাক্ষাৎকাৰটোত যেতিয়া অভিনেত্ৰীগৰাকীক সোধা হৈছিল যে নৰেন্দ্ৰ মোদী, অটল বিহাৰী বাজপেয়ী আৰু ইন্দিৰা গান্ধীৰ ভিতৰত কোনজন প্ৰধানমন্ত্ৰীক তেওঁ আটাইতকৈ বেছি প্ৰশংসা কৰে। এই কথাত অভিনেত্ৰীগৰাকীয়ে লগে লগে উত্তৰ দিলে, “মোৰ প্ৰিয় প্ৰধানমন্ত্ৰী নৰেন্দ্ৰ মোদী।”

পাছত যেতিয়া কংগনাক সাক্ষাৎকাৰত কোৱা হৈছিল যে এই বক্তব্যৰ বাবে তেওঁ ট্ৰ’ল হ’ব পাৰে। কিন্তু এই বিষয়ে অভিনেত্ৰীগৰাকীয়ে কয়, ‘মোক ট্ৰ’ল কৰা হ’ব পাৰে কিন্তু সচাঁই প্ৰধানমন্ত্ৰী মোদীৰ বিৰুদ্ধে মোৰ কোনো অভিযোগ নাই।’ নিজৰ বক্তব্যৰ আঁৰৰ যুক্তি উদঙাই দি কংগনাই কয়, ‘যিসকল সত্যৰ লগত আছে। মোৰ কথাবোৰে তেওঁলোকৰ বাবে মহৌষধৰ দৰে কাম কৰিব। একেদৰে শ্ৰীকৃষ্ণৰ জন্মৰ সময়ত সুদামাই তেওঁৰ বিষয়ে কৈছিল যে তেওঁ ঈশ্বৰ, কিন্তু দুৰ্যোধনে কৈছিল যে তেওঁ কিদৰে ঈশ্বৰ হ’ব পাৰে? গোটেই দিনটো মহিলাৰ লগত নাচি থাকে, গুজৱ কৰে আৰু আন একো কাম নকৰে৷ গতিকে যদি আপোনাৰ বিশ্বাস ভাল নহয় তেন্তে আপুনিও সৰ্বশক্তিমানক অসন্মান কৰিব পাৰে।’ অৰ্থাৎ মোদীৰ সমালোচকসকলক পৰোক্ষভাৱে দুৰ্যোধন আখ্যা দিয়ে৷