মোদীৰ টুইটে আউল লগাইছে যোগীৰ অংকত

ডিজিটেল ডেস্ক: ‘গণতন্ত্ৰত ৰাইজেই ৰজা’। এই গুৰুত্বপূৰ্ণ কথাষাৰ ভাৰতৰ ৰাজনৈতিক নেতাৰ নিৰ্বাচনৰ আগে আগেহে মনলৈ আহে। নিৰ্বাচনৰ পূৰ্বে জনসাধাৰণক ৰজা পাতি কৃপাধন্য হৈ পৰৱৰ্তী পাঁচবছৰৰ নিজৰ আঙুলি মূৰত নচুৱাই থাকে এইসকল মুকুটবিহীন ৰজাক। এয়াই ভাৰতীয় ৰাজনীতিৰ স্বৰূপ। ইয়াৰ বিৰূপ দেখা নগ’ল উত্তৰ-প্ৰদেশতো। মুখ্যমন্ত্ৰী যোগী আদিত্য নাথে দলিতৰ ঘৰত ভাতখোৱা এখন ফটো ভাইৰেল হৈ পৰাৰ পাছতেই বিৰোধীয়ে আক্ৰমণৰ লক্ষ্য কৰি লৈছে মুখ্যমন্ত্ৰীগৰাকীক। ইয়াৰ সৈতে সংগতি ৰাখি প্ৰধানমন্ত্ৰী মোদীৰ এটা পূৰণা টুইট ভাইৰেল হৈ পৰিছে। ২০১৪ চনৰ টুইটটোৱে যেন খাল খান্দি যখিনী চপালে বিজেপিলৈ। শুকুৰবাবে উত্তৰ-প্ৰদেশৰ মুখ্যমন্ত্ৰী যোগী আদিত্য নাথে আগন্তুক বিধানসভা নিৰ্বাচনৰ নিৰ্বাচনী প্ৰচাৰৰ মাজতে গোৰখপুৰৰ এটা দলিত ঘৰৰ পৰিয়ালত উপস্থিত হয়। তাতেই তেওঁ পৰিয়ালৰ আন সদস্যৰ সৈতে আহাৰ গ্ৰহণ কৰে। এই ফটো ভাইৰেল হৈ পৰা পাছত যোগী আদিত্য নাথক সমালোচনাৰ লক্ষ্য কৰি লয় SBSPৰ নেতা ওম প্ৰকাশ ৰাজভাৰে। তেওঁ এটা টুইটত সমালোচনা কৰি কয় যে, যোগী আদিত্যনাথে দলিতৰ ঘৰত আজি আহাৰ খাইছে, কিন্তু বিগত ৫ বছৰ ধৰি তেওঁ দলিতৰ প্ৰাপ্য খাই আহিছে। হাথৰসৰ এগৰাকী ছোৱালীৰ মৃতদেহ নিশা ২ বজাত পেট্ৰ’ল-কেৰাচিন ঢালি জ্বলাই দিয়া হৈছিল। তেতিয়া মুখ্যমন্ত্ৰী যোগী আদিত্য নাথে অপৰাধীৰ পক্ষ লৈছিল। এই কথা পিছপৰা দলিত লোকসকলে পাহৰি যোৱা নাই বুলি সকীয়াই দি ওম প্ৰকাশ ৰাজভাৰে কয়, যোগী চৰকাৰে কেৱল দলিত আৰু পিছপৰা লোকসকলক অত্যাচাৰ কৰিছে।

योगीजी दलित के घर खाना तो आज खा रहे हैं लेकिन दलित-पिछड़े का हक 5 साल से खाये है,योगीजी हाथरस की बेटी की डेड बॉडी केरोसिन और पेट्रोल डालकर 2बजे रात जला दी गई तब आप अत्याचारियों के साथ थे,उप्र के पिछड़े दलित भूले नहीं है,योगी सरकार नें दलित-पिछड़ो के साथ सिर्फ जुल्म ज्यादती की है। pic.twitter.com/ca1dAOEUxj

— Om Prakash Rajbhar (@oprajbhar) January 14, 2022

মন কৰিব লগা যে বিগত কেইটামান সপ্তাহৰ পৰা যোগী চৰকাৰৰ বহু মন্ত্ৰী-বিধায়কে ভাজপা ত্যাগ কৰি সমাজবাদী পাৰ্টীত যোগদান কৰি আছে। এই পদত্যাগী মন্ত্ৰী-বিধায়কসকলৰ অধিকাংশই দলিত তথা পিছপৰা শ্ৰেণীৰ। যাৰ বাবে ভাজপাৰ পৰা এই দলিত আৰু পিছপৰা শ্ৰেণীৰ লোকসকলৰ সমৰ্থন হেৰাই গৈছে। ভাজপাৰ প্ৰতি দলিতসকলৰ হেৰাই যোৱা এই সমৰ্থন ঘূৰাই আনিবলৈ যোগী আদিত্য নাথে দলিতৰ ঘৰত আহাৰ গ্ৰহণ কৰি তেওঁলোকৰ মন জয়ৰ প্ৰচেষ্টা চলাইছে বুলি জানিব পৰা গৈছে। যোগী আদিত্য নাথৰ ভাইৰেল ফটোত এতিয়া তীব্ৰ ঘৃণা আৰু সমালোচনামূলক মন্তব্যৰে ভৰি পৰাৰ লগতে দেশৰ প্ৰধানমন্ত্ৰী নৰেন্দ্ৰ মোদীও বাছি যোৱা নাই সাধাৰণ নাগৰিকৰ সমালোচনাৰ পৰা। মোদীৰ এটা পূৰণি টুইট বৰ্তমান ভাইৰেল হৈ পৰা দেখা গৈছে। টুইটটোৰ মোদীয়ে কৈছিল যে ‘কংগ্ৰেছ নেতাসকল দৰিদ্ৰতা পৰ্যটনত বিশেষজ্ঞ। কেমেৰাৰ সৈতে তেওঁলোকে গাঁৱলৈ যায় আৰু দৰিদ্ৰ লোকৰ সৈতে বহি খাদ্য খাই ফটো তোলে’। মোদীৰ এই টুইটতো সমালোচকসকলে প্ৰধানমন্ত্ৰী মোদী, কেন্দ্ৰীয় গৃহমন্ত্ৰী অমিত শ্বাহ আৰু উত্তৰ-প্ৰদেশৰ মুখ্যমন্ত্ৰী য়োগী আদিত্য নাথক লক্ষ্য কৰি লয় আৰু যোগীৰ এই ফটোৰ আঁৰত নিজৰ ন্যস্ত স্বাৰ্থ আৰু নাটক নিৰ্হিত হৈ আছে বুলি মন্তব্য কৰে। স্বৰূপাৰ্থত মোদীয়ে পোতা শূলত ফুটি মৰিছে বিজেপিৰ বহু বাঘা বাঘা নেতা।

Congress leaders specialise in poverty tourism. With cameras, they go to villages, sit with the poor, eat their food & get pictures clicked.

— Narendra Modi (@narendramodi) April 9, 2014

এনেদৰেই সমালোচনা-প্ৰতি সমালোচনাৰে এতিয়া মুখৰ হৈ পৰিছে উত্তৰ-প্ৰদেশৰ ৰাজনীতি। হিন্দু-মুছলমানৰ ৰাজনীতিৰে ধৰ্মীয় মেৰুকৰণ কৰিব বিচৰা বিজেপিয়ে উত্তৰ-প্ৰদেশৰ প্ৰেক্ষাপটত ধৰ্মীয় মেৰু বিভাজনত ঠাৱনি নাপাই উচ্চ-নিম্নবৰ্ণৰ ৰাজনীতিত আশ্ৰয় লোৱা ঘটনাই সমগ্ৰ দেশতে আকৌ বিচ্চিন্নতাবাদৰ ৰাজনীতিত নতুন মূৰ আনি দিছে।