ডিজিটেল ডেস্কঃ ব্ৰেইন ডেড হোৱা এজন যুৱকে মৃত্যুৰ পূৰ্বে কৰি গল মহান কাম। যুৱকজনৰ ৮টা অংগ সফলভাৱে আন লোকৰ শৰীৰত সংৰোপণ কৰা হয়। ৰাজস্থানত ঘটিছে এই ঘটনা। ৰাজ্যখনত প্ৰথমবাৰৰ বাবে এয়াৰ এম্বুলেন্সেৰে অংগসমূহ এছএমএছ হাস্পতাললৈ লৈ যোৱাৰ জৰিয়তে ট্ৰান্সপ্লাণ্ট প্ৰক্ৰিয়া সম্পূৰ্ণ কৰা হয়। লগতে এই ক্ষেত্ৰত একেজন ৰোগীৰ হাওঁফাওঁ আৰু হৃদযন্ত্ৰ সংৰোপণ কৰা হৈছে। ৰাজস্থানত প্ৰথমবাৰৰ বাবে হাওঁফাওঁ সংৰোপণ কৰা হয়।
চিকিৎসা শিক্ষা সম্পাদক অম্বৰীশ কুমাৰে জনোৱা মতে, ৩৩ বছৰীয়া বিষ্ণু প্ৰসাদ নামৰ যুৱকজন দুৰ্ঘটনাত গুৰুতৰভাৱে আহত হোৱাৰ পাছত ১১ ডিচেম্বৰত ঝলাৱাৰ চিকিৎসা মহাবিদ্যালয়ত ভৰ্তি কৰোৱা হৈছিল। চিকিৎসকৰ আপ্ৰাণ চেষ্টাৰ পাছতো বিষ্ণুক বচাব পৰা নাছিল। বিষ্ণুক ‘ব্ৰেইন ডেড’ বুলি ঘোষণা কৰা হৈছিল।
বিষ্ণুদাসক ‘ব্ৰেইন ডেড’ বুলি ঘোষণা কৰাৰ পিছত তেওঁৰ অংগ দান কৰিবলৈ তেওঁৰ পৰিয়ালৰ লোক আগবাঢ়ি আহে। পৰিয়ালটোৱে বিষ্ণুৰ অংগ (বৃক্ক, যকৃত, হৃদযন্ত্ৰ, হাওঁফাওঁ আৰু দুয়োটা কৰ্ণিয়া) দান কৰিবলৈ সন্মত হয়। ঝলাৱাৰ চিকিৎসা মহাবিদ্যালয়ৰ স্নায়ুচাৰ্জন ডাঃ ৰামসেৱক যোগীয়ে জনোৱা মতে, যোৱা ১২ ডিচেম্বৰত বিষ্ণু প্ৰসাদক চিকিৎসা সমিতিয়ে মগজু মৃত বুলি ঘোষণা কৰিছিল।
ছাৱাই মান সিং (এছ এম এছ) চিকিৎসালয়ৰ অধীক্ষক ডাঃ দীপক মহেশ্বৰীয়ে কয় যে জয়পুৰত ৰোগীসকলৰ এটা বৃক্ক, দুটা হাওঁফাওঁ আৰু হৃদযন্ত্ৰ সংৰোপণ কৰাৰ বিপৰীতে আন এটা বৃক্ক আৰু যকৃত এইমছ-যোধপুৰলৈ প্ৰেৰণ কৰা হৈছে। অংগসমূহ কঢ়িয়াই অনা হেলিকপ্টাৰখন জয়পুৰৰ এছ এম এছ মেডিকেল কলেজত উপস্থিত হয় আৰু তাৰ পৰাই অংগসমূহ এছ এম এছ হাস্পতাললৈ লৈ যোৱাৰ বাবে এটা গ্ৰীণ কৰিডৰ তৈয়াৰ কৰা হয়।
বিষ্ণু প্ৰসাদ আৰু তেওঁৰ পৰিয়ালৰ প্ৰতি সকলোৱে কৃতজ্ঞতা প্ৰকাশ কৰিছে।
Continue Reading
