ডিজিটেল ডেস্ক: মৰক্কোত সংঘটিত বিধ্বংসী ভূমিকম্পৰ বিভীষিকা এতিয়াও মাৰ যোৱা নাই৷ ২০০০ৰো অধিক লোকে প্ৰাণ হেৰুৱাইছে এই ভূমিকম্পত৷
আমেৰিকাৰ ভূতাত্ত্বিক জৰীপৰ তথ্য অনুসৰি উত্তৰ আফ্ৰিকাৰ এই অংশত বিগত এটা শতিকাত এনেধৰণৰ বৃহৎ ভূমিকম্প হোৱা নাই। মৰক্কোৰ অন্যতম গুৰুত্বপূৰ্ণ চহৰ মাৰাকেছৰ পৰা ৭১ কিলোমিটাৰ দক্ষিণ-পশ্চিমে ভূপৃষ্ঠৰ পৰা ১৮.৫ কিলোমিটাৰ তলত আছিল ভূমিকম্পৰ অভিকেন্দ্ৰ।
এই বিধ্বংসী ভূমিকম্পৰ পাছত আৰ্তজনলৈ সহায়ৰ হাত আগবঢ়াইছে ফুটবলৰ মহাতাৰকা ক্ৰিষ্টিয়ানো ৰোনাল্ডোৱে৷ ৰোনাল্ডোৱে তেওঁৰ হোটেল পেষ্টানা চিআৰ7 প্ৰয়োজন হোৱা লোকসকলৰ বাবে মুকলি ৰাখিছে। এই শোকাৱহ ভূমিকম্পৰ পাছত ফুটবলাৰজনে আফ্ৰিকান ৰাষ্ট্ৰৰ বাবে মহৎ কাম কৰি মানৱতাৰ মহান দৃষ্টান্ত দাঙি ধৰিছে৷
এইটো মন কৰিবলগীয়া যে তাৰকা ফুটবলাৰজনে প্ৰাকৃতিক দুৰ্যোগৰ দ্বাৰা আক্ৰান্ত ভুক্তভোগীসকলক সহায় কৰিবলৈ আগবাঢ়ি অহা কাৰ্য এয়াই প্ৰথম নহয়। তেওঁ পূৰ্বে তুৰস্ক-চিৰিয়াৰ লোকসকললৈও ভূমিকম্পৰ সময়ত সহায়ৰ হাত আগবঢ়াইছিল৷
মাৰাকেচৰ উপকণ্ঠত অৱস্থিত ৰোনাল্ডোৰ হোটেলখনক ফ’ৰ ষ্টাৰ দিয়া হৈছে আৰু ইয়াত পুল, ফিটনেছ চেণ্টাৰ, ৰেষ্টুৰেণ্ট আৰু টেৰেছকে ধৰি অসংখ্য সুবিধা আছে।
Continue Reading
